Dikarang Chris Bishop//
KUCHING: Opis Bomba enggau Penyah Penusah (KBPM) ngadu kerejasama enggau Opis Orang Indu enggau Ruang Bilik Sarawak (JWKS) ngambika ulih nerenak penau nyeliah penusah angus kelebih agi ba sida orang indu.
Direktor JBPM Sarawak, Nor Hisham Mohamad madahka pekara nya berat ketegal ari semua kes angus ke nyadi di rumah panjai, 44 peratus datai ari pengawa nyumai tauka bebekiu.
“Enti kitai nyebut senentang pengawa nyumai, majoriti mungkur orang indu lalu tu mih seiti kerejasama ti manah.
“JBPM enggau JWKS deka nerenak penau senentang chara nyeliah penusah angus ngagai orang indu,” ku iya.
Iya mansutka jaku nya ba pengerami nutup Program Summer Camp 2016 di Indu Opis JBPM Sarawak, Jalai Tabuan ditu, kemari.
Ngenang senentang program nya Nor Hisham ngarap bala penyereta ulih nguna penau ke dipelajar lalu dipeturun ngagai kaling bukai.
Beambika chunto penusah angus ke nyadi di Kampung Tupong bedau lama tu tadi iya madah penanggul ba trafik ngujungka raban Bomba laun datai ba palan penyadi.
“Ketegal nya aku ngarap bala penyereta program Summer Camp tu ukai semina bekunsi penau nyeliah penusah angus tang mega ulih mantu nentuka jalai nuju palan penusah ulih ditengah,” ku iya.
Program Summer Camp 2016 diadu tiga hari berunggu berengkah 25 nyentuk ngagai 27 Mei lalu digulu 28 iku penyereta iya nya kaban dalam JWKS.
JBPM Sarawak mega deka mantu JWKS ngadu dua agi program Summer Camp sereta 20 program nyeliah penusah angus di serata Sarawak.
Bela datai Direktor JWKS, Noriah Ahmad.