KUCHING: Sapit Kepala Menteri I Datuk Amar Douglas Uggah Embas madahka pemutus tiga iku Kaban Kunsil Nengeri (ADUN) ari UPP, ke minta nyadi kaban PBB deka diputuska nengah Aum Kunsil Kereja Besai (MKT) PBB enda lama agi.
Uggah madah Sekretari Eksekutif PBB ngaku udah nerima pom peminta nyadi kaban ari tiga ADUN nya.
Tiga ADUN ke kala bediri ngena tiket Chalun Terus BN maya Pengawa Bepilih Besai Nengeri DUN ke-11 tu tadi iya nya, ADUN Mambong (Datuk Dr Jerip Susil), ADUN Opar (Ranum Mina) enggau ADUN Engkilili (Johnical Rayong).
Uggah ti mega nyadi Mandal Presiden Kanan PBB madahka pemutus bala ADUN tu ke minta masuk PBB nya peneka sida empu lalu ukai ari pejal ari orang bukai.
“Ba penemu PBB, pemutus sida tiga ke minta masuk PBB tu bepanggai ba pemutus MKT, beri awak endur aum bejuraika pekara nya lalu ngaga pemutus,” ku iya madah lebuh dirandau pengudah pengawa nerima dokumen pangku pengawa ari Opis Menteri Pamansang Tanah nengah ex-menteri iya, Tan Sri Datuk Amar Dr James Jemut anak Masing.
Ba tanya bukai, enti sema mayuh agi tubuh ADUN ke bedau bisi parti, lalu minta nyadi kaban parti PBB, ngujungka PBB nyadi parti ke pengabis besai ke mayuh ngembuan penuduk DUN sereta kaban ADUN, ku Uggah:
“PBB sigi parti ke pengabis besai, lalu nambah enggau nya, PBB dalam PRN ke-11 tu tadi menang semua 40 penuduk,” ku iya.
Ba penemu Sapit Kepala Menteri II ke mega nyadi Menteri Pemansang Infrastruktur enggau Perengka Pengangkut Tan Sri Datuk Amar James Jemut Masing madah dalam konstitusyen parti, sapa-sapa tau nguing ke bukai nitihka peneka diri.
“Enti sida iya deka masuk ngagai siti-siti parti nya, nya barang ku sida tiga, peneka sida empu. Aku enda ulih mutus pasal pekara tu, sida (ADUN Ranum, Dr Jerip enggau Johnical) deka masuk parti tu, sida iya empu mutus ke diri empu…Nya aja jaku aku,” ku iya.
Ba tanya bukai pasal pemayuh penuduk PBB nangkan tu ila enti sema amat bala ADUN nya deka masuk PBB, ku Masing:
“Sida (PBB) nyangka bisi 49, 50, 60…Ba penemu aku nya peneka sida empu ‘freedom of choice’. Sida iya deka masuk PBB, barang ku sida,” ku iya.
Masing ti mega nyadi Presiden Parti Rayat Sarawak (PRS) madahka masuk barang gerempung baka ke ditulis dalam konstitusyen sigi dikemendar.
“Lalu enti iya dikemendar, sida iya peneka ati mutuska kuing diri. Aku madah munyi nya laban madahka nya gaya ulah orang baka tu ngiga pengentap diri…Aku enggai nyadi mantah peneka sida,” ku Masing
Sebedau nya, ba aum pemberita ke diatur ba hari ke sebaka, Parti Rakyat Bersatu (UPP) enda lantang ati enggau ulah tiga iku pengari rayat sida nya ke diripot bisi minta nyadi kaban PBB.
Sekretari Besai UPP George Lo ba aum media kemari madahka parti nya (UPP) bedau ulih berandau enggau tiga ADUN nya.
Ku Lo, UPP berasai ensiban enti amat tiga iku ADUN tu minta masuk nyadi kaban PBB, pengudah sida tiga tu dipilih nengah bantu UPP.