KUCHING: Program Nemuai Gawai Dayak ngagai Pontianak ke diatur Sarawak Dayak Graduat Association (SDGA) nyerumba pengerami Dayak Kalimantan Barat Pekan Gawai Dayak nerima timbal ti manah ari raban Gerempung Ukai Dikuasa Perintah (NGO) Dayak Sarawak enggau Sabah.
Penemuai ngagai Indonesia ti berengkah 19 ngagai 22 Mei tu tadi betuaika Presiden SDGA Dr Dusit Jaul, lalu disempulang 180 iku kaban NGO Dayak.
Entara NGO nya baka Momogun National Congress ari Sabah ti betuaika Presiden iya, Datuk Henrynus Amin; Borneo Heritage Foundation, Dayak National Congress (DNC) betuaika Presiden, Mengga Mikui.
Nambahka nya, kaban ari Society for The Rights of Indigenous Peoples (SCRIPS); Dayak Oil Palm Planters’ Association (DOPPA) enggau Sarawak Dayak Iban Association (SADIA).
Raban 180 iku nya bisi ngulu Pengerami Pekan Gawai Dayak Ke-31, ti dipenyadika Gabenor Kalimantan Barat, Bapak Drs Cornellis M.H kena 20 Mei.
Kena 21 Mei, raban nya ngulu sesi randau ke udah diatur NGO Dayak KALBAR baka KALBAR Dayak Foundation, Majlis Adat Dayak Nasional (MADN), Ikatan Sarjana Dayak (ISKA) enggau Dewan Adat Dayak (DAD).
Program bukai ke bisi diatur nyengkaum nemuai ngagai Institut Dayakcology, St Joseph Cathedral enggau tugu khatulistiwa.
Penemuai Gawai Dayak ngagai Pontianak taun tu mega ti ketiga kali diatur SDGA ke alai taun tu pemadu mayuh penyereta, iya nya 180 iku.
Nengah penemuai nya pesereta ulih meda kediri gaya mayuh macham adat asal Dayak ke bisi dipandangka maya pemuka pengerami kelimpah ari ulih meda produk Dayak ti dipandangka ba Rumah Radang.