Dayak patut nyaup perintah nyungkak pemansang

0

Ngambika bansa Dayak enda tinggal ba arus pemansang ti dipejalaika perintah diatu: Uggah

// Dikarang Jacqueline David //

KUCHING: Komuniti Dayak dilalau terus besaup enggau perintah ngerembaika pemansang ti udah diperambu.

Sapit Kepala Menteri Datuk Amar Douglas Uggah Embas madah munyi nya ngambika Dayak enda tinggal ari komuniti bukai ba arus pemansang ti dipejalaika perintah diatu, ke siru ngintu pengelantang pendiau mensia mayuh.

“Kitai ngarap kelebih agi komuniti Dayak majak bekerejasama kelimpah ari ngintu pengerami Hari Gawai enda lama agi, lalu peratika utai ti nekul kitai nyapai pemujur sereta pemansang ngelama tu.

“Sebarang penanggul ke nekul kitai, diatu mih maya kitai berundingka pekara ke deka dijapai ngambika kitai bebendar agi gawa sereta besaup enggau pangan diri nyengkaum enggau perintah,” ku iya madah ba jaku pesan Hari Gawai Dayak 2016.

Uggah madah munyi nya pengudah pengawa Nerima Pangku ari ex-Menteri Pemansang Tanah ti mega Menteri Pemansang Infrastruktur enggau Perengka  Pengangkut, Tan Sri Datuk Amar Dr James Jemut Masing di opis menteri nya di Begunan Baitulmakmur ditu, bedau lama ti udah.

Uggah ti mega nyadi Menteri Betanam Betupi Moden enggau Ekonomi Menua Pesisir madah, pengerami Hari Gawai 2016, pengerami ke besai reti laban apin lama tu ke udah, Perintah Barisan Nasional (BN) udah nyapai pemujur menang ba Pengawa Bepilih Besai Kunsil Nengeri ke-11 (PRN ke-11).

Terima kasih ngagai rayat ke udah milih kami, ke nyukung enggau tulung sida. Sukung tu mandangka bansa Dayak agi arapka pengulih perintah BN ngerembaika pemansang di menua tu,” ku iya.

Uggah enggau sida sebilik meri Selamat Hari Gawai ngagai semua bansa Dayak di serata menua tu ke deka nyambut pengerami nya nya kena 1 Jun tu.