PRS tetap enda setuju laban enti PBB menggi ngelui 40 penuduk, parti BN bukai ditu nyau baka nadai guna agi
// Dikarang Chris Bishop //
KUCHING: Parti Rakyat Sarawak (PRS) mengkang ngenan pemutus penemu rambau Aum Supreme Kunsil parti ke diadu ba bulan Mac ke udah, ti enda setuju Parti Pesaka Bumiputera Bersatu (PBB) nguasa lebih setengah ari 82 penuduk Kunsil Nengeri (DUN).
Sapit Kepala Menteri ke mega Presiden PRS Tan Sri Datuk Amar Dr James Jemut anak Masing madah pemutus parti dinan rat lalu ngarap presiden ari Parti Sa’ati Rakyat Sarawak (SUPP) enggau Parti Progresif Demokratik Sarawak (SPDP) bela mantaika runding sida sentang pekara nya.
“Aku enggai nandu pekara ke udah disebut aku dulu agi ari tu. Kami (PRS) udah netapka pemutus rambau aum supreme kunsil parti lalu mengkang ngenan rat pemutus nya,” ku iya.
Masing dipinta meri penemu sentang pinta semilan iku kaban kunsil nengeri (ADUN) ke nadai parti ti udah ngenataika pom pinta nyereta PBB rambau Pengerami Malam Hari Gawai PRS 2016 malam ensanus.
Ngenggaika pemberita suah ngenatai tanya ke sama, Masing minta pemberita bela nanya presiden SUPP Datuk Dr Sim Kui Huan enggau presiden SPDP Datuk Tiong King Sing.
“Ukai semina PRS aja ngasai pekara tu tang bela mungkur SPDP enggau SUPP. Kita patut minta penemu ari presiden kededua parti nya.
“Nama kebuah nandu tanya ke sama ngagai aku, aku enggai nyaut agi. Tanya mega ngagai Dr Sim enggau Datuk Tiong, baka ni runding seduai.
“Enti seduai enggai nyaut, tuliska mega seduai enggai nyaut,” ku Masing.
Dulu agi ari tu, Masing kala mansutka jaku diak PBB patut enda nguasa lebih setengah ari penyampau 82 DUN.
Enti ngelui ari 40 ku iya, parti bukai dalam serakup BN nengeri iya nya PRS, SPDP enggau SUPP baka nadai guna agi.
Masing madah pekara nya berat ngambi pemaik atur bekunsi kuasa dalam serakup dinan enggau manah.
Sida ke ngenatai pinta nyereta PBB iya nya ADUN Mambong Dr. Jerip Susil, ADUN Opar Ranum Mina, ADUN Engkilili Dr. Johnical Rayong enggau ADUN Pakan Tan Sri William Mawan.
Lima ke bukai iya nya ADUN Mulu Datuk Gerawat Gala, ADUN Bekenu Rosey Yunus, ADUN Batu Danau Paulus Palu Gumbang, ADUN Serembu Miro Simuh enggau ADUN Bukit Semuja John Ilus.
Mawan, Rosey enggau Paulus kala nyadi ketuai dalam Parti Tenaga Rakyat Sarawak (TERAS) ke alai Gerawat, Miro enggau John endang kaban PBB ti ningkilka diri ari parti ngambi ulih meri awak ngagai sida bediri ngena tikit chalun terus BN.
Ketetiga agi ke bukai Dr Jerip, Dr Johnical enggau Ranum ngarika Parti Rakyat Bersatu (UPP).