NANDU PEJALAI: Mensia mayuh benung beranti ba palan penganti bas, seberai Penyangkai Bot Ekspres Sibu sebedau nandu pejalai nangkan ke nya.
SIBU: Penyangkai Bot Ekspres Sibu ditu belabuh dedat enggau penatai mensia mayuh ari pelilih Kapit enggau Song ti deka mulai ke diri ngagai mengeri sepengudah lebih seminggu kemisi beserimbai enggau Gawai Dayak tu tadi.
Penyampau tu dipelabaka deka mayuh agi pagila (sehari tu) laban sekula deka dibuka Hari Satu tu.
Kasau Simon, 31, ari Rumah George Li, Song enggau sida menyanak, sekeda ari mensia mayuh ti bisi dipeda baru datai nyangkaika diri ngena ekspres pagi kemari.
Iya madah, nangkan pejalai ari Song sida menyanak deka nandu pejalai sida mulai ke diri ngagai Bintulu ngena bas.
“Kami menyanak pulai sehari tu ngambika pagila ulih belelak dulu sebedau gawa kelimpah bala anak deka besekula baru hari Satu tu,” pia ku iya madah maya berandau enggau pengarang berita, kemari.
Anak iya, Alexsonrina, Primeri Empat enggau Prisila Sima, Prima ri Satu besekula ba Sekula Primari (SK) Bintulu.
Bekenangka Gawai Dayak taun tu, Kasau madah, sida serumah ngintu Gawai Dayak enggau chukup pengerami diumbaka mayuh sida gawa di mengeri bekenaka awak nya begulai enggau pangan diri.
“Ngarapka Gawai taun tu mai mayuh agi pengelantang enggau penyenang ari taun-taun ke udah,” ku iya ti gawa ba LNG Bintulu.
Ukai semina mulai ke diri ngagai mengeri bisi mega mensia mayuh ke dipeda dia benung nganti ekspres bekejang laban deka mulai ke diri ngagai pelilih Kapit ketegal gawa.
Rosdie Billy, 32, madah, sida menyanak ari Rumah Banyoi, Sengayan, Kanowit deka pulai ke Kem Sempili, Kapit alai iya gawa udah ke seminggu kemisi Gawai.
Nambahka nya anak iya dua iku iya nya Slyvester Sabang, Premeri Tiga enggau Sabrina Sebai, Tadika Dua deka besekula di SK Amang, hari Satu tu.
“Kami menyanak pulai ari rumah panjai pagi tadi (kemari) ngena van lalu nangkan ke tu ngena bot ekspres ngelawa kem alai aku gawa,” ku iya madah.
Rosdie mega bela bekunsika cherita pengerami sida serumah ngintu Gawai taun tu tadi.
Ku iya, iya bela baka bala bukai ngarapka Gawai ke sekali tu ulih mai mayuh agi tuah ari Gawai ke udah-udah.