Sukung apai indai nengah PIBG beguna amat dikena napi pemar dunya pelajar diatu
// Dikarang Rengenyan Labang //
KUCHING: Sukung apai indai nengah Gerempung Apai Indai enggau Pengajar (PIBG) elemen ti beguna amat nentuka penyulut pelajar nembiak.
Menteri Muda Perengka Guna Mensia Mayuh, Dr. Abdul Rahman Junaidi madah, pekara ke sama ti dikemeran sereta dikemeratka apai indai nengah PIBG udah nempa penyulut pelajar nembiak Kolej Datu Patinggi Abang Haji (DPAH) Abdillah.
“Enti nadai sukung ari apai indai, tentu sekula bisi tusah mimit betapi enggau pemar dunya pelajar bala nembiak nyengkaum Kolej DPAH Abdillah.
“Tusah senang patut ditapi begulai entara apai indai, pengajar sereta bala nembiak dikena ngulihka penyulut ba dunya pelajar,” ku iya lebuh bejaku sereta bejadika Majlis Permuafakatan 2016 Kolej DPAH Abdillah ba kolej nya empu ditu, kemari.
Bejaku baru iya madah, dalam konteks pelajar,batang pengawa besai sekula iya nya nempa chara belajar ti bekualiti.
“Proses belajar ukai semina fokus ngagai akses penemu aja, tang lebih ngagai proses nyikap diri betapi enggau pemar ti bebida jemah ila,” ku iya.
Berebak enggau tu Dr. Abdul Rahman muji Kolej DPAH Abdillah bisi nyendiaka peluang belajar ke bekualiti enggau betikas dunya, ke ulih nempa nembiak ti ulih besemekih.
“Kolej Abdillah iya nya kilang pengeluar pengereja pengawa bepengelandik baka lutor, injinir, kaban politik, pengelicha, pengajar enggau mayuh agi ke bukai ti ulih napi lanskap politik, adat enggau ekonomi menua.
“Aku deka terus nyukung juluk enggau kuing sekula tu ngambika perambu enggau program pelajar ke dipejalaika setipak enggau peminta guna kemaya hari tu,” ku iya.
Sama bisi datai ba program nya kemari, Prinsipal Kolej DPAH Abdillah Ibrahim Jamain enggau YDP PIBG Kolej DPAH Abdillah Hallman Sabri enggau ke bukai.