Rayat enda ibuh nangika projek tu enda digaga laban Masing deka lebih ngemeratka projek tu, ku Alexander
// Dikarang Judan Bungap //
TERIMA KASIH RAYAT: Alexander nyuaka tepa ngagai Penghulu Juni kelai terima kasih ketegal sukung ti manah rayat dia ngagai iya maya PRN tu tadi.
KANOWIT: Rayat nengeri tu lebih agi di Jagau patut berasai temegah ati laban Sapit Kepala Menteri ke baru Tan Sri Datuk Amar Dr James Masing ngemeratka pemansang nyengkaum projek Jalai Nanga Ngungun-Jagau.
Kaban Kunsil Nengeri (ADUN) Ngemah Alexander Vincent madah, projek ke beungkus RM50 juta nya udah dikemendarka perintah lalu ngarapka mujur digaga.
“Kitai ditu benasit amat laban kitai bisi Masing ti mega Menteri Pemansang Infrastruktur udah madahka diri deka lebih ngemeratka pemujur projek tu. Nya alai, kita anang nangika projek jalai tu enda digaga,” pia ku iya madah.
Iya mantaika pekara tu maya Pengerami Ngiling Bidai enggau Pengerami Makai Selamat ke pemujur iya ngetan DUN Ngemah ba Balai Mensia Mayuh Jagau ditu, kemari.
Berebak enggau tu, Alexander mega minta peranak menua Jagau nyukat tanah asal sida suba sebedau diasuh perintah pindah ngagai Skim Gempuru Jagau ke diatu maya menua dikeruga komunis menya.
Kebuah pia ku iya, ngambika tanah sida disukat nengah insentif nyukat kelinggi tanah adat Bumiputera sebedau diberi pala tanah nengah Seksyen 18.
“Dudi hari ila enti pala tanah udah bisi dia kita deka lantang agi ngemansangka tanah kita baka betanamka getah tauka pemansang ke bukai.
“Berindik ari nya, bala penghulu enggau tuai rumah bai bala kita nyukat tanah. Anang ngandalka orang bukai,” ku iya madahka baru.
Bekenangka peminta rayat di Jagau, Alexander madah, baka tiang legit talipaun, diatu tender projek nya dibuka lalu benung ngiga palan ke engkeman tauka semak agi enggau rumah panjai.
Nambahka nya iya mega madahka diri deka bebendar nyanda projek ngemanahka agi klinik di genturung menua nya.
Ba pengerami ke diatur nya, Alexander madahka diri temegah ati laban undi rayat dia ngagai iya maya bepilih tu tadi chukup manah ari taun ke udah tauka majoriti ke dua mayuh ba DUN nya.
“Taja orang mayuh ngerituk tang undi kita ngagai BN chukup manah laban kita ngasaika diri agi mayuh bekenaka pemansang ari perintah,” pia ku iya.
Dikena meri terima kasih ngagai rayat dia Alexander bisi meri RM8,000 ngagai tiap 24 buah rumah panjai ba menua nya.
Iya mega ngerah meri RM15,000 dikena ngemanah balai mensia mayuh nyengkaum 300 iti bangku enggau RM10,000 ungkup gerija.
Dulu agi ari tu peranak menua nya mega bisi diberi 300 iti tung ai.