OOOHAA!!: Lo (tengah) nguluka bala mayuh di Balai Mayuh Guna Kampung Tematu ngeradak ai pengayu. Bela dipeda John (tiga kanan).
Karnival sereta pengerami ti mantaika adat sereta main asal pia mega asil jari ulih matak temuai datai
Dikarang Chris Bishop //
KUCHING: Nengah saup ari Opis Menteri Dagang Temuai enggau sida ke ngaul diri ba industri, Karnival Gawai Tematu ulih nyadi sebengkah agi produk dagang temuai di mengeri Kuching.
Kaban Kunsil Nengeri (ADUN) Batu Kitang Lo Khere Chiang pechaya karnival ti mantaika adat enggau main asal bansa Bidayuh kelimpah ti mandangka kraf bansa nya, enti dikelakuka enggau betul ulih matak orang dagang temuai datai.
“Aku pechaya raban ke megai tanggungpengawa ba senentang industri dagang temuai ulih nyaup ngelaku pengawa baka Karnival Gawai Tematu lalu mai orang dagang temuai bela ngerami karnival tu.
“Karnival mega ulih mai penatai pemisi ngagai peranak Kampung Tematu. Baka ke dipeda kitai mayuh bansal ti nyual asil pengelandik jari ari bansa Bidayuh bisi dijual,”ku iya.
Lo mansutka jaku tu ba pengerami bejadi Karnival Gawai Tematu 2016 ke diatur di Balai Mayuh Guna Kelab Rekreasi Kampung Tematu ditu, malam ensanus.
Iya ngarika Menteri Kunsil Kandang Menua Datuk Dr Sim Kui Huan.
Ngenang kaul bukai, Lo ke nyadi Chairman Opis Kunsil Kandang Padawan (MPP) ngansak raban Bidayuh majakka pemujur ke udah ditempa sida ngelamatu.
Ku iya, peranak bansa Bidayuh udah nempa mayuh pemujur ba mayuh bengkah pengawa baikka nya ba pekara pelajar ke alai mayuh sida udah nyadi raban professional ke nyadi luya, engineer, akauntan sereta ke bukai.
“Nengah mimit aja bantu ari perintah, aku meda bansa Bidayuh ngembuan jalai ke tampak jemah ila. Pajakka pemujur tu,”ku iya.
Ba pengerami malam nya, Pekit Dayung Gawea Tematu 2016 ke nyadi tusun pengawa ninting taun bisi mega diatur.
Bela datai Chairman Pengatur karnival, John Pata, Ketuai bansa Kampung Tematu Philip Simbor enggau orang bukai.