PENGGI NUAN: Tr Andam nyuaka tikai ngagai Sim (empat kiba) pengudah ngemujur pengawa nutup Gawai di Kuching malam ensanus. Bela dipeda Lo (lima kiba) enggau Sidu (kanan).
KUCHING: Semaya RM80 juta rambau kimpin Pengawa Bepilih Nengeri Ke-11 (PRU11) ungkup pengawa mutarka bah tunggal dalam kandang ngelingi Batu Kawa deka ditagih ari Menteri Besai Datuk Seri Najib Tun Razak, ku Menteri Opis Kunsil Kandang Menua Datuk Dr Sim Kui Huan.
Bejaku rambau pengawa Ngiling Bidai Genturung Pengentap Pendiau Batu Kawa Lot Fasa 1 malam ensanus, Dr Sim pechaya duit belanja nya ulih nyaup nyeliah bah tunggal ke nyadi ninting taun.
“Aku deka betemu enggau Menteri Besai nagih RM80 juta ke disemaya dikena mutarka penusah bah tunggal dalam kandang ngelingi Batu Kawa.
“Semaya nya ukai semaya aku, tang semaya Menteri Besai,”ku iya.
Nyempelah pekara bukai, Dr Sim ngenataika pengaga pengudah Kepala Menteri Datuk Patinggi Tan Sri Adenan Satem ngemasuk Opis Parit enggau Entali Ai (DID) dalam kuasa opis menteri iya.
Enggau pemutus nya, iya ke mega ADUN Batu Kawa madah pengawa mutar penusah bah tunggal deka mudah agi dikereja ke alai pengawa nya ukai semina mungkur kandang endur Batu Kawa aja, tang di serata Sarawak.
“Berindik enggau nya, dalam timpuh lima taun ti deka datai mayuh pengawa deka diadu kitai.
“Nengah Program Tranformasyen Menua Pesisir (RTP), penyampau RM25 juta diungkup ngagai Batu Kawa, nambah RM80 juta ke disemaya Menteri Besai.
“Aku deka ngadu kerejasama enggau DID ke alai ijinsi nya deka nyendia pelin besai ke dikearap ulih nyeliah bah tunggal,”ku iya.
Kelimpah ari nya, DR Sim mega madah mayuh agi perengka guna ke tau ngenataika pemisi belanja ngagai rayat deka disedia di Batu Kawa.
Dalam timpuh lima taun ti deka datai, aku minta semua mantu aku lalu kitai deka bebendar ngadu pengawa ngemansang Batu Kawa, tandu iya.
Dulu agi ari nya, Chairman JKKK Desa Wira Lot Fasa 1 TR Andam anak Nyamun ba jaku pengelalu pechaya penusah bah tunggal ke suah nyadi deka diputar pengudah Barisan Nasional (BN) menang di Batu Kawa.
“Diatu SUPP-BN udah menang lalu kitai ngarap pengawa nyeliah bah tunggal ulih dikelengkas.
“Bah ukai semina ngerusak rumah kami tang mega ngerusak reta tengkira, sekeda nya enda ulih nurun kereja lalu nembiak pan enda ulih besekula kelimpah ti mai penyakit denggi,”ku iya.
Ba pengawa nya, Tr Andam bisi nyuaka kar Kampung Desa Wira Lot Fasa 1 ngagai Dr Sim ke tebal agi mandangka pendiau parit ke patut dikemanah.
Ngarap nengah kar tu, Dr Sim ulih nemu enggau silik pendiau parit ba genturung pendiau kami ke patut dikemanah, digaga besai enggau lengkas, tandu iya.