Kepala Menteri ngelaluka sebarang jalai digaga lengkas
KUCHING: Kepala Menteri Datuk Patinggi Tan Sri Adenan Satem dekaka Komiti Teknikal mulaika kuasa ngepunka pejurai enggau jampat dikena ngiga jalai pemadu manah bekaul enggau pekara nya.
Iya nengah sebengkah penerang kemari madahka pengawa numbuhka Komiti Teknikal nya nyadika pemun ngagai pengawa ngamatka semaya ngagai rayat Sarawak.
“Aku ngelaluka sebarang jalai ke digaga lalu aum patut diatur enggau lengkas.
“Endang udah ditemu deka nguna timpuh ke lama laban proses tu mayuh leman sereta udah lama tejanggal tang tu nyadika pemun (pengawa) ngamatka semaya kitai (ngagai rayat),” ku iya nyemetak.
Ku Adenan nambah, pengawa numbuhka komiti nya rambau aum renggat tinggi keterubah mulaika kuasa kena 13 Jun tu tadi mai reti Perintah Besai meri timbal ngagai peminta Sarawak bekaul enggau pekara nya.
“Aku nerima manah jaku dibantaika Menteri ba Opis Menteri Besai, Nancy Shukri bekaul enggau pengawa ngenegapka undang-undang enggau atur pengawa ke bekaul enggau peminta kitai ngagai Perintah Besai ngambi berundingka ripot enggau pekara bekaul Suruhanjaya Cobbold.
“Nyengkaum berundingka ripot enggau pekara Komiti Antara Perintah (IGS), Akta Malaysia enggau Sempekat Malaysia (1963),” ku iya.
Kemari Nancy dalam jaku berita dipansutka iya madahka pekara nya lalu madahka komiti nya deka disereta pengari ari perintah nengeri Sarawak enggau Sabah begulai enggau pengari ari Perintah Besai sereta orang landik sejarah ari kededua nengeri nya.
Kaban Parlimen (MP) Batang Sadong nya madahka aum kena 13 Jun tu tadi betuaika iya empu enggau Menteri Perintah Besai ari Sabah, Datuk Seri Anifah Aman.
Aum tu digulu Luyar Besai Menua (Tan Sri Mohamed Apandi Ali), pengari perintah besai, pengari perintah Sabah iya nya sekretari perintah kededua nengeri enggau luyar besai nengeri, enggau pengari perintah Sarawak iya nya sapit luyar besai nengeri sereta direktor Opis Sekretari Pekara Wang Sarawak.
Nancy madahka aum nya mega besetujuka komiti teknikal nya deka ngelala pekara pemuntang nitihka dalam konteks Ripot Komiti Antara Peirntah (IGC), Sempekat Malaysia 1963, Akta Malaysia 1963, Undang-Undang Perintah Besai enggau ripot betulis tauka dokumen bukai baka Ripot Suruhanjaya Cobbold, sereta deka nyendiaka pekara sereta pemutar ungkup diperundingka perintah besai.
“Dikearap ripot keterubah bepelasarka pekara enggau pemutar nya ulih tembu ngambi ulih dibantaika ngagai Kabinet besai datai ba ujung taun tu,” ku iya dalam surat berita kemari.
“Diatu umbas endur kami mantaika pengeran rayat Sarawak. Tu ukai semina jaku tempa aja, tang deka ngamatka pekara ti disemayaka kepala menteri kami,” ku iya.