MIRI: Lebih 1.5 juta iku temuai dirikod betengahka Kompleks Imigresyen, Kuarantin enggau Kastam (CIQ) Sungai Tujoh Miri, ti nyadi pintu penama besai ngagai Sarawak kenyau ari Januari nyentukka 24 Jun taun tu.
Ketuai Opis Imigresyen Miri, Roy G. Fender madahka penyampau nya dipelaba deka nambah datai ba pengerami Hari Raya Aidilfitri kelebih agi ujung minggu, iya nya maya mensia mayuh mulaika diri ke menua sereta pejalai ke bukai.
“CIQ Sungai Tujuh deka muka kaunter tambah dikena nentuka bala pengusung enda berintai panjai ngujungka penanggul sekut nyadi, kelebih agi kena ka musin kemisi Hari Raya ti ka datai,” ku iya.
Roy mantaika jaku nya pengudah nyuaka bungkus pemakai kena bebuka puasa pemeri ari Institut Pusat Memandu Miri enggau raban Opis Imigresyen ngagai bala pengusung ti tama ngagai CIQ Sungai Tujuh Miri malam kemari.
Ku iya nambah, kenyau ari Januari nyentukka 24 Jun tu tadi, urung 853, 659 iku udah tama ngagai Miri nengah CIQ Sungai Tujuh lalu sepenyampau 718,515 iku mega pansut mansang ngagai Brunei.
“Dikena nentuka pejalai ba pintu entara menua lanchar kenaka pengerami Hari Raya ti ka datai, sepenyampau tujuh kaunter udah dibuka nyengkaum dua lupak servis bas pansut enggau tama disedia ninting ari,” ku iya nerang.
Ba rikot ku iya, CIQ Sungai Tujuh kala ngasaika penyekut dataika satu kilometer maya ti kena ke musin pengerami, berindik ari nya alai piak bejalaika inisiatif muka kaunter enggau lupak tambah.
“Penyampau entukar tama ngagai Miri nambah maya jam pengerami kelebih agi Taun Baru China enggau Gawai tu tadi lalu penyam[au tu dipelaba niki datai ba Hari Raya Aidilfitri enda lama da agi,” ku iya nandu.
Nitihka pansik, Januari bisi 222, 711 iku pengusung ke tama, Februari (269, 975 iku), March (300, 384 iku), April (264, 415 iku), Mei (297, 560 iku) lalu Jun (217, 129 iku).
“Pengawa muka kaunter baru enggau lupak deka nyaup ngurangka penyekut ba pintu penama ba garis entara menua sereta enda masau jam pejalai bala pengusung sekalika tama tauka pansut ari Miri,” ku iya.