TETAP NGINGATKA SIDA KE KENA JIL: Fatimah (empat kanan), begambar enggau bala pengereja pengawa sereta pemesai opis Rumah Jil Sarawak, beserimbai enggau pengawa Nyuaka Sumbangsih Kuih Raya di Rumah Jil Puncak Borneo kemari.
KUCHING: Penanggul betapi enggau pengawa gian dadah ke nyadi ba raban nembiak sereta orang ke besai tuai pia mega orang ke gawa di menua tu ngirauka ati, laban penanggul nya majak nyadi.
Menteri Pengelantang Pendiau, Orang Indu enggau Pemansang Ruang Bilik, Datuk Fatimah madah beratika rikod orang ke kena jil dalam rumah jil di menua tu iya nya penyalah gian dadah chukup ngirauka ati laban majak nambah.
Fatimah nyemaka tiga iti operasi ti dipejalaika, ngiga orang nadai pengentap pendiau (gelendangan) di Kuching enggau Bintulu bedau lama tu tadi, beratika sekeda ari sida ti nadai pengentap pendiau tu ditemu positif dadah.
“Tu nyadi penanggul ke besai ba kitai, lalu ditu meh pemerat program pengerai ke sida ti betapi enggau penanggul bansa tu ngambika teulihka pengelantang pendiau ke manah agi,” ku iya.
Pemujur program pengerai dalam rumah jil ulih meri asil ke manah agi ba sida ke kena jil sereta sida ti kelia kala kena jil pia mega nyengkaum komuniti sekali.
Iya mega madah, pemerat ba semua rumah jil di Malaysia, iya nya beratika program pegerai nya mujur dipejalaika iya nya ngenurunka rikut sida ti tama ke rumah jil.
“Tu laban pemujur program pengerai dalam rumah jil ukai semina deka ngurangka pemayuh pengawa salah tang ke berat endar nadai kes bansa nya nandu baru di rikut ulih orang ke sama ngaga pengawa salah.
“Enti ari penemu aku empu, beratika ukum mati mandatori iya nya orang ti kena ukum tu baka ke nadai peluang kedua agi, lalu ukai pengerai ke patut diperundingka kitai baru.
“Kitai mega ngarapka bisi ubah dalam undang-undang ukum sampai mati di Malaysia baka ke udah dibantaika ulih Menteri di opis Menteri Besai, Nancy Shukri ke bisi enggau licha Kongres Sedunya Betengali Alan enggau Pengawa Ukum Sampai Mati di Oslo Norway,” ku iya.
Fatimah madah munyi nya lebuh bejaku ba atur pengawa Nyuaka Sumbangsih Kuih Raya 2016 ngagai Opis Rumah Jil Malaysia Menua Sarawak di Rumah Jil Puncak Borneo, ditu kemari.
Di Sarawak aja, urung enam buah Rumah Jil, iya nya di Puncak Borneo, Sri Aman, Sibu, Bintulu, Miri enggau Limbang, lalu pemayuh orang ke kena jil, iya nya dalam 1,891 iku.