Kaban Parlimen ari Sarawak mega enda kurang pengelandik, sebaka enggau sida ari Semenanjung
// Dikarang Jacqueline R. David //
KUCHING: Sapit Kepala Menteri I Datuk Amar Douglas Uggah anak Embas madahka ubah dalam kabinet Perintah Besai kemari kelebih agi iya ke nganti penuduk ke kala dipangku iya suba iya nya Menteri Kebun Dandang Besai enggau Komoditi enda diberi ngagai orang Sarawak, enda ngelantangka ati iya.
Uggah madahka, Kaban Parlimen (MP) ari Sarawak mega enda kurang pengelandik, sebaka enggau kaban parlimen ari Semenanjung.
“Aku enda lantang ati laban nadai menteri ari Sarawak ulih diperundingka mangku penuduk aku suba.
“Nama kebuah aku enda lantang ati? Aku deka mantaika kebuah iya. Kami ngarapka abis nadai bisi seiku ari MP kami bisi pegelandik dichiri mangku pengawa nya,” ku Uggah ti mega ngarika PESAKA, Parti Pesaka Bumiputera Bersatu Sarawak (PBB).
Iya ti mega nyadi Mandal Presiden Kanan PBB sereta Menteri Pengawa Betanam Betupi Moden sereta Ekonomi Menua Pesisir madahka Sarawak sigi nganti orang ke ngisi penuduk iya suba diberi ngagai MP Sara-wak.
“Aku ngarapka penuduk aku suba diberi ngagai MP Sarawak, taja pia aku meri pengaga ati ngagai Henry Sum Agung ke udah dipadu nyadi Sapit Menteri Pengawa Dagang Dalam Menua, Ger-empung Kerejasama enggau Pekara Bebeli Barang,” ku iya.
Kelimpah ari nya, Tan Sri William Mawan Ikom madahka iya enda ngambi ati taja pan enda masuk lis dalam ubah kabinet Perintah Besai ti baru ke dibantaika Menteri Besai Datuk Seri Mohd Najib Razak, kemari.
Mawan ti mega nyadi Kaban Parlimen Saratok madahka, tu laban iya sigi enda kala ngelakuka diri ke sebarang pangku pengawa nyadi menteri Perintah Besai.
“Aku enda kala minta megai pangku pengawa di dalam kabinet Perintah Besai, tang nya semina dikelikuhka media,” ku iya madah lebuh dirandau kemari.
Mawan nandu baru, taja pan enda mangku sebarang portfolio dalam perintah baik nya ba renggat perintah besai tauka nengeri, iya deka majakka pengawa gawa ke rayat di sitak iya empu.
“Aku diberi tanggung pengawa gawa ba sitak aku lalu aku enda kala lari ari tanggung pengawa aku empu.
“Aku ngarapka penyukung sereta bala bakih aku deka terus enggau aku ngambika BN tegap agi,” ku iya, ti mega nyadi Kaban Parlimen Saratok.
Ba aum media ti digaga Menteri Besai kemari, ubah mimit ba kabinet ngerintaika sekeda nama baru baka Menteri Wang Kedua dipangku Datuk Johari Abdul Ghani ke nganti penuduk Datuk Seri Ahmad Husni Hanadzlah ke pinchin.
Kelimpah ari nya, Datuk Sri Abdul Rahman Dahlan ngambi penuduk Menteri ba Opis Menteri Besai, Tan Sri Wahid Omar ke mangku tanggung pengawa bekait enggau Unit Perambu Ekonomi.
Penuduk Abdul Rahman ke nyadi Menteri Pengawa Berumah, Nengeri sereta Opis Kandang Men-ua suba diisi Datuk Seri Mohamad Noh Omar diatu.
Najib mega madahka Datuk Lee Chee Leong deka mangku pengawa nyadi Sapit Menteri Wang ke bela dipangku Datuk Othman Aziz.
Presiden Gerakan Datuk Seri Mah Siew Kong dipadu mangku pengawa penuduk Uggah suba iya nya Menteri Kebun Dandang Besai enggau Komoditi, lalu nyadi sapit iya, Datuk Datu Nasrun Datu Mansur.
Uggah badu nyadi menteri ba Perintah Besai pengudah iya menang bediri ba PRN ke-11 tu tadi, ke bediri di sitak Bukit Saban, Betong, kelimpah ke dipadu nyadi Sapit Kepala Menteri begulai enggau dua iku agi Sapit Kepala Menteri Sarawak iya nya Datuk Amar Abang Johari Tun Openg enggau Tan Sri Datuk Amar Dr James Jemut anak Masing.