SARIKEI: Pengawa meri sereta nambahka penyedar pemesai guna ngemeratka pengelikun, kelebih agi bekaul enggau pun penusah angus nyadi, patut chakah sereta suah agi dipejalai.
Kaban Kunsil Nengeri (ADUN) N46 Meradong, Ding Kuong Hiing madah, pengawa tu beguna amat ngagai komuniti ba menua pesisir baka komuniti ba tumpuk pendiau sereta mega peranak rumah panjai ke seruran betapi enggau penanggul ke bansa tu.
“Penyedar rayat ba kandang menua pesisir kelebih agi bekaul enggau pekara tu agi kurang.
“Nya kebuah enti sema kitai beratika sekeda penusah ke nyadi baka penusah rumah panjai enggau rumah kediri angus, majak suah nyadi ba kandang menua tu.
“Tu ketegal tikas penyedar enggau ulah bala komuniti ba pun penusah nyadi sereta tanggungpengawa ke patut dipejalaika sida dikena nyaga sereta nagang agi ba tikas ti baruh.
“Berindik ari nya, pengawa opis ti bekaul baka Opis Bomba enggau Penyelamat ti ngatur licha enggau aktiviti bekaul dikena meri penerang ngagai bala komuniti senentang pekara ke bekaul enggau pengelikun nyadi pengawa chukup manah sereta patut terus dipejalaika,” ku Ding.
Iya mantaika jaku nya rambau Pengerami Ngiling Bidai Gawai Dayak 2016, Opis Bomba enggau Penyelamat Sarikei, bedau lama ti udah.
Pengerami tu diatur ba Opis Bomba enggau Peneyelamat Sarikei lalu udah digulu 80 iku, nyengkaum raban bomba, bala ketuai opis perintah sereta bala temuai bukai ari bala komuniti ngelingi.
Kenu ku Ding, dikena nyapai juluk nya, piak ba renggat ketuai komuniti kelebih agi pengari rayat di kandang menua nya deka seruran meri sukung rat ngagai pekara nya.
Ku iya, dikena nentuka pengelikun kelebih agi ke bekaul enggau penusah angus, sida ba renggat ketuai udah merambu deka meri mayuh agi perengka pengerara api ngagai rumah panjai sereta mega tumpuk pendiau.
“Nya alai, kitai ngarapka piak bomba ulih nyaup kitai ngajar bala komuniti senentang jalai ngena perengka pengerara agi enggau chara ke betul,” ku Ding nandu.
Ba kenang ke bukai. Ketuai Opis Bomba enggau Penyelamat Sarikei, Suna Kaha dalam jaku dipansutka iya rambau pengerami nya madahka, kandang ke diatu piak bomba chakah bejalaika kimpin pengelikun ari penusah angus, pengawa nagang ba tumpuk pendiau enggau rumah panjai ke mungkur komuniti di kandang menua pesisir enggau komuniti di mengeri.
“Dalam taun 2015, Opis Bomba enggau Penyelamat Sarikei udah mujur ngatur 57 bengkah Kimpin Pengelikun Penusah Angus di rumah panjai lalu 11 aktiviti ba renggat tumpuk pendiau.
“Berebak enggau nya mega, sepenyampau 260 iti perengka pengerara api udah diberi ngagai rayat.
“Kelimpah ari nya mega, piak bomba bisi ngelancharka 10 bengkah tim bomba komuniti ti ditumbuh di kandang menua Sarikei apin lama ke udah, dikena ngerapitka kerejasama enggau bekunsika penemu teknik nagang sereta ngerara api ngagai bala komuniti menua nya. Tim tu ditumbuh dalam Komiti Pemansang enggau Pengelikun Genturung Pendiau (JKKK), Palan Pengentap Pendiau (KRT) sereta gerempung baka Tim Bomba Volunteer (PBS),” ku Suna nandu.
Sama bisi datai rambau pengerami nya Ketuai Opis Bomba enggau Penyelamat Bintangor, Nicholas Belulin, SAO Hendry Gimong enggau Ketuai Raban Nembiak Parti Rakyat Bersatu Sarawak (SUPP) Pamaqpang Sarikei, Teng Ung Woo.