MERI PENERANG: Nogeh (tiga kanan) enggau Paza (empat kanan) mendingka penerang ke dipadah Inting ba penemuai nya.
BAU: Pengawa ngemanah makit ikan enggau sayur di Bau benung dipejalai enggau lanchar,ku Sapit Menteri Betanam Betupi enggai Industri Agro Anthony Nogeh Gumbek kemari.
Nogeh ke mega Kaban Parlimen (MP) Mas Gading madah pengawa ke tebal agi bekaul enggau ngemanah begunan ti disadang tembu pemadu jampat ba bulan September ke deka datai.
“Pengawa diadu FAMA (Ejensi Pengelaku Asil Betanam Betupi Perintah Besai) ke nyadi seiti ejensi ke dikuasa opis menteri aku lalu pengawa begunaka belanja RM500,000.
“Kitai ngarap pengawa tu ulih tembu nitihka perambu iya nya ba bulan September ngambika orang dagang ulih berengkah bedagang ditu,”ku iya pengudah nemuai ngabas pejalai pengawa di palan makit nya kemari.
Iya disempulang Direktor FAMA Sarawak Paza Dan sereta Pemesai Pelilih Bau Inting Nyami.
Dulu agi ari nya, sida ngabas makit sementara ke didiri ba tanah lapang besemak enggau dirit kedai makai ti dipangka ribut kena Hari Satu tu tadi.
Nogeh nambah, pengawa ngemanah makit ke diatu sigi patut dikereja ngambika ulih meri pengelantang ngagai orang dagang enggau pemeli.
Diatu, orang dagang diasuh bedagang ba makit sementara dulu seraya nganti pengawa ngemanah makit tu tembu, tandu iya.
Rambau penemuai nya, Nogeh bisi ngagihka sekeda belanja ngagai orang dagang ke dituntung penusah nya.
“Ketegal penusah nya, sida nadai penatai belanja. Puji tuhan sida udah ulih bedagang baru baka selama.
“FAMA enggau Opis Kunsil Bau udah ngereja pengawa manah ketegal mujur masang kanopi enggau lengkas (pagi seiti pengudah poenuysah nyadi).
“Tu mih chara Barisan Nasional, kitai begulai enggau rayat ke dituntung penusah, ngadu kereja nitihka pemisi belanja,”ku Nogeh.
Ukai baka ke sekeda kem ti suah bejai pengawa ke diadu BN ke alai ba maya ke baka tu, sida nadai dipeda ayan meri bantu ngagai rayat, tandu iya.