Urung 98 peratus jalai ti nyambung semua rumah panjai di Telang Usan agi jalai kompeni kayu
// Dikarang Mohamad Abdullah //
BELUBANG: Dennis (kanan) nunjukka lubang ti besai ba jalai kompeni batang ti ditengah ngagai Long Lewoh ba Apoh, sama bisi dipeda iya nya pemesai ejensi perintah ti matau gaya jalai dia.
MIRI: Urung RM5 bilion diungkupka perintah deka dikena ngaga projek jalai ti nyambung semua rumah panjai ba Telang Usan ngena jalai ti udah dibelakin.
Kaban Kunsil Nengeri (ADUN) Telang Usan, Dennis Ngau madah, dipelaba urung lebih 500 kilometer jalai ti bedau digaga tu ti nyadi batang jalai nyambung semua genturung pendiau di Telang Usan tauka urung 98 peratus ari semua jalai ba sitak nya agi nengah jalai ti jai (luchak) tauka jalai balak.
“Taja bisi runding deka nyendiaka jalai belakin ke semua tumpuk pendiau ba Telang Usan, tu deka nguna timpuh ke lama mimit laban mayuh macham penanggul deka ditapi lalu semua peranak ba sitak tu semina ngarapka jalai ti endang udah bisi, iya nya ti digaga kompeni kayu deka terus diintu ejensi perintah” ku Dennis bejaku lebuh ti matau sereta beratika infrastruktur ba sitak Telang Usan kemari,ti disempulang pemesai ari ejensi perintah ngemata bagi endur ti deka diberi penyikap perengka guna pia mega beratika gaya jalai ba Baram Tengah, Apoh enggau Tutoh.
Nitihka dipadah Dennis, iya udah minta ngagai perintah besai ngambika bisi berundingka jalai sereta chara dikena napi penanggul ti enda disadang deka nyadi ari diatu ukai maya penanggul (penyai jalai) nya udah nyadi ba Telang Usan ti semina ngarapka seiti aja jalai ti nyambung ngagai mengeri Miri enggau pelilih bukai ba nengeri tu.
Iya ngarapka perintah nengeri bisi buah runding ti manah kena ngubah sistem jalai kompeni kayu (bekau jalai kompeni kayu) ngambika ulih ditengah semua peranak ba sitak nya enggau lantang.
Dennis madah, kitai (perintah) enda ulih minta saup ari kompeni kayu seruran ngemataka jalai ti bisi diatu laban pengawa ngulihka kayu nyau nadai dipejalaika agi, nya ti ngirauka iya laban mayuh jalai ti nyambung rumah panjai ba serap Telang Usan dipelaba deka jai/runtuh lalu tu deka nyadi penanggul besai sereta enda disadang.
“Perintah meseti udah mupuk berundingka jalai sereta bakani chara deka napi penanggul ti enda disadang nyadi lalu ukai nganti penanggul nya udah nuntung,” ku iya madah.
Serak nya, Dennis madahka iya udah merambu ngagai perintah ngambika ngaga tim JKR ti ulih mindah kena ngemanahka jalai ba menua pesisir ti disikap ngena perengka guna ke ulih dikena ngaga jalai enggau jematan lalu sida ulih mindahkin kitu ba kandang menua ba menua pesisir, ngambika kitai (perintah) enda ngenusahka kompeni balak kena mutarka penanggul jalai ti jai.
Long Lama ulih dijadika stesen kena nyambung semua genturung pendiau ari Apoh, Tutoh sereta Baram Tengah lalu enti sema bisi penanggul jalai ti amat jai kitai enda ngambi masa ti lama miki iya, ku iya nambah.
Aku nemu perambu tu deka nyadi nyata jemah ila laban perintah BN udah bisi pelin kediri empu tang gaya jalai ke diatu enda tau enda diputar enggau lengkas, ku tandu Kaban Kunsil Nengeri (ADUN) Telang Usan nya.