Sepengelama 33 taun nganti diatu pengawa ngaga Jalai Baleh udah nyadi nyata, ku Masing
NYADI NYATA: Masing ngarika perintah nyain kunterik ngaga jalai sepemanjai 35 km Jalai Baleh ngagai Tekat Ai Baleh.
KAPIT: Sapit Kepala Menteri, Tan Sri Datuk Amar Dr James Jemut Masing berasai lantang ati enggau pemendar diberi perintah ba pengawa ngaga Jalai Baleh.
Iya madah diri udah nganti pengelama 33 taun lalu diatu pengawa ngaga Jalai Baleh udah nyadi nyata.
“Aku meri besai terima kasih ngagai perintah ketegal udah ngaga jalai tu. Aku endang udah lama nganti, 33 taun tauka lapan penggal nyadi Kaban Kunsil Nengeri (ADUN) Baleh, alai baru diatu jalai tu deka digaga.
“Jalai tu deka digaga asil ari peminta rayat sereta pangka ari Tekat Ai Baleh ke deka digaga lalu Tekat Ai Baleh digaga pan ari peminta rayat.
“Taja bisi sekeda rayat ningkah tang diatu semua sida udah setujuka pengawa ngaga tekat ai nya,” ku Masing ke lalu nyadi Menteri Pemansang Infrastruktur enggau Pengangkut meri penerang.
Ku iya, pekara tu bepanggai ba perintah ngasuh iya nyadi nyata. Jalai sepemanjai 73.013km ari Baleh rembus ngagai Tekat Ai Baleh meseti dulu digaga nentuka tekat ai nya ulih digaga.
Pia mega ngagai semua bala tuai rumah ke udah meri sukung ba pengawa ngaga tekat ai nya, Masing deka meri besai terima kasih ngagai semua bala tuai rumah ke diau ba sepemanjai Sungai Baleh.
“Nengah sukung bala tuai rumah ngujungka pengawa ngaga jalai tu deka lanchar dikereja. Bala kunteriktir meseti bisi kaul ke manah dalam mantu sida. Enti sema bisi sebarang pekara ti diguna peranak rumah panjai, piak kunteriktor meseti nulung sida,” ku Masing nangkan bala kunteriktor kena lemai Hari Enam, 2 Julai, rambau nyereta pengawa miringka Projek Akses Jalai Nuju Taba Tekat Ai Baleh.
Pengawa tu udah diatur ba Sungai Stapang, Sepata Baleh, urung iya dua jam pejalai ngena perau panjai ari Kapit.
Pengawa miring tu diungkupka ngagai Projek Koridor Kuasa Ulih Dikena Baru Sarawak (SCORE) ari baruh Pakej A bagi Phase 2, 3, 4, 5, 6 enggau 7 ba pengawa ngaga jalai sepemanjai 35 km ke beungkus RM700 juta. Pengawa tu udah berengkah dipejalai dalam bulan Mei lalu dipelabaka tembu ujung taun 2018.
Rintai bala kunteriktor ke udah dipadu ngaga jalai iya nya Phase 2 – Debessa Development sdn Bhd (4.8 km), Phase 3 – Pekerjaan Piasau Konterit Sdn Bhd (5.9 km), Phase – Untang Jaya Sdn Bhd (4 5.1 km), Phase 5 – Perkejaan Piasau Konterit Sdn Bhd (5.85 km), Phase 6 – Perkejaan Piasau Kontrik Sdn Bhd (5.55 km) sereta Phase 7 – Semado Sdn Bhd (4.058 km).
Pengawa ngaga jalai ari Jematan Baleh ngelawa Sungai Sebetang iya nya urung setengah ari semua penyampau jalai 70.013 km ba projek jalai Baleh ke beungkus RM1.4 bilion.
Perambu ngaga Tekat Ai Baleh deka nelan belanja penyampau RM10 juta.
“Pengawa ngaga tekat ai tu; ke satu deka ngadaka kuasa serata Sarawak, ungkup rayat ke diau di Kuching, Sibu, Bintulu, Miri lalu industri ulih berengkah dipejalai laban iya begunaka elekterik.
“Tang semua nya enda chukup, pekara ke beguna amat eleterik tu ukai semina meri bekal kuasa ngagai rayat di Kuching, Sibu tauka di Miri aja, tang mega meseti meri penampak ngagai sida ke diau di Sungai Baleh.
“Nadai guna enti sema ngasilka elekterik tang peranak rumah panjai ba sepemanjai Sungai Baleh agi diau dalam petang. Nya alai aku nentuka Sarawak Energy Berhad (SEB) meri bekal elekterik ngagai semua peranak rumah panjai di Baleh lalu aku deka nentuka perintah mega deka baka nya,” ku Masing nandu.
Kenang ba pekara kereja enggau pengereja pengawa, maya Tekat Ai Baleh digaga ila, deka begunaka 3,500 iku ba semua pangku pengawa. Iya ngarapka pemerat ba pangku pengawa nya deka diberi ngagai rayat di Baleh empu.
Nya alai ku iya, piak SEB diatu benung meri latih ngagai semua raban nembiak dikena nyikap sida enggau pengelandik sereta ngembuan setipikit.
“Aku ngenggaika bala nembiak di Baleh tinggal ari arus pemansang. Aku dekaka sida nyereta pengawa lalu dikena nentuka pekara tu nyadi nyata, sida meseti dilatih ngambika ulih nangkup peminta industri.
“Tejuka bala nembiak ke baru tembu sekula ngerejista diri empu. SEB diatu benung bejalaika pengawa rejista. Aku merambu semua raban nembiak ke udah nembuka pelajar sekula ba Form Lima enggau Form Enam, tejuka sida tu diberi latih ngambika sida ulih gawa nitihka penau diri.
“Nadai guna enti semua pengawa puang dipenggi orang luar lalu bala nembiak kitai semina meda aja. Aku ngenggaika sida tinggal tang chakah agi ngaul diri ba pemansang,” ku Masing nyimpul.
Sekeda bala ke bisi nyempulang pejalai Masing iya nya ADUN Pelagus, Wilson Nyabong Ijang, Manijar Besai Opis Kereja Raya (JKR) Bagi Menua Tengah Sarawak, Injinir John Aten, Residen Kapit, Joseph Blelayong, Pemesai Pelilih Bukit Mabong, Douglas Pungga, Pemesai Pelilih Kapit, Elvis Didit, Sapit Residen Kapit (Pemansang), Minggu Jampung, Injinir Chieng Siong Ming, Kaunsilor Bakat Gira, Kaunsilor George Tang, Pemancha David Dian, Pemancha Yong thu fook, Pengulu Wong Kie Ing, Pengulu Sia Shui Poh, Pengulu Enggin Nyipa, Pengulu Sallang Batang, Pengulu Undie Bajai, sereta bala bukai.