Dikarang Chris Bishop//
MERI PENERANG: Baru Bian maya diinterbiu pengarang berita lebuh pengerami begulai enggau media malam ensanus.
KUCHING: Parti Keadilan Rakyat (PKR) Sarawak andalka pengawa ti udah diadu Kepala Menteri Datuk Patinggi Tan Sri Adenan Satem kenyau mangku pengawa nya berengkah 28 Februari 2014.
Chairman PKR Baru Bian ke mega Kaban Kunsil Nengeri (ADUN) Ba’kelalan madah Adenan seiku ketuai ke chukup konsisten kelebih ba sentang polisi enggau jaku ke dipansut.
“Aku ngasai iya konsisten ba jaku ti dipansut lalu udah dikeringka rambau nyimpul jurai Aum Kunsil Nengeri (DUN) ke udah.
“Enti kitai macha jaku ti dipansut iya maya nya, Adenan udah ngeletak seiti tikas lalu aku andal meda pekara nya.
“Iya bejaku sentang sejarah, pekara undang-undang enggau pekara ti bekaul enggau atur ngeringka Model Panel Code (MPC). Semua tu chukup manah ke alai kami ke nyadi luyar belajarka pekara tu,” ku Baru.
Iya mansutka jaku nya rambau pengerami PKR Sarawak begulai enggau Media Kuching ke diatur ba sebuah restoren ditu, malam ensanus.
Pengerami bela digulu Sapit Chairman PKR Nengeri ke mega ADUN Batu Lintang See Chee How enggau ADUN Krian Ali Biju.
Ngenang kaul ke sama, Baru netap atur numbuhka ‘taskforce’ seiti pengawa ti manah tang sekalika tim nya ulih ngemujur tanggungpengawa sigi diperati sereta dianti rayat.
“Aku ngasai atur ti dipejalai
nya konsisten lalu kitai andalka pekara nya,”ku nambah.
Dulu agi ari nya, Baru ditanya sentang penemuai sida seraban (See enggau Ali) betemu enggau Adenan ensanus.
Ku Baru, penemuai nya diatur enggau tuju meri jaku puji ngagai Adenan ti udah bulih mandat ungkup renggat ke baru.