‘Anti-Grooming Law’ patut dipejurai sereta digazet

0

KUCHING: Aktivis rama, Tan Sri Lee Lam Thye minta perintah bejurai lalu ngazet sebengkah undang-undang ke dikumbai ‘Anti-Grooming Law’ di parlimen ngambi tau dikena mutarka kes ke bekaul enggau pedofil.

Ku iya, undang-undang ke dikumbai Anti Grooming Law ulih dikena autoriti nawa orang pedofil ti ngembuan niat ngayah sida ke nembiak kelebih agi nembiak indu baka kes seiku peranak Britain, Robert Huckle bedau lama tu tadi.

“Pedofil sebengkah ulah seseiku orang rindu ngumpul gambar (pornografik) kelebih agi nembiak indu ke alai sida mega rindu bekelala enggau nembiak ba internet sebedau nguji deka betemu enggau nembiak nya.

“Ba ikas tu mih, Komiti Komunikasyen enggau Multimedia Malaysia (SKMM) ulih nemu niat ke endar pedofil tu lalu kitai meseti bisi undang-undang ti ulih dikena neritka adat, sebedau sida ngayahka nembiak,” ku iya.

Lee mansutka jaku tu ba aum pengarang berita pengudah pengawa OUM Icon Talk 2016 –Etiqueette and Sosial Media ke diatur di Open University Malaysia (OUM) pampang Kuching ditu, kemari.

Nengah Anti Grooming Law ku Lee, orang ke disangka pedofil ulih dikangau sereta dipansik autoriti, betanya kebuah sida ngumpul gambar sereta nguji deka bekelala enggau nembiak.

“Asai aku ba maya ke diatu, bala apai indai enda nemu sekalika deka ngaga ripot polis tauka enda.

“Ripot nya chukup beguna ngambi tau dikena polis ngepunka tasat. Apai indai mega enda nemu anak sida udah diining orang pedofil tu,” ku iya.

Lee pechaya tu mih maya perintah bisi Anti-Grooming Law ngambi tau dikena nyeliah penusah nyadi berengkah ari pun.

Iya nambah, undang-undang nya sigi udah dikena di menua tunga ke Barat tang enda di Malaysia.

Huckle, 30, diukum Kort Britain jil seumur idup pengudah ngaku salah ba 71 iti tuduh ke bekaul enggau pengawa ngayah nembiak di Malaysia.

Iya diripot ngereja mayuh macham penyalah seksual ba 200 iku nembiak Malaysia ke beumur entara enam bulan enggau 12 taun kenyau ari 2006 nyentuk 2014.