Kemeranka pementas enggau penyerakup ba pupu raban bansa

0

// Dikarang Rengenyan Labang //

BAU: Pementas enggau penyerakup pupu raban bansa ti bebida jalai pengarap di nengeri tu, patut terus dikemeran sereta dikemerat ngambi tau pulaika pengelantang enggau ke pemansang Sarawak.

Sapit Menteri Betanam Betupi enggau Bumai, Anthony Nogeh Gumbek madah, pementas enggau penyerakup nya amat nyata nyadi di Sarawak kelebih agi maya bisi pengerami Gawai Dayak, Hari Raya sereta Tahun Baru China enggau pengerami ke bukai, ke alai pengerami nya dikerami semua pupu bansa.

“Sarawak chukup tebilang ba pementas enggau penyerakup laban lebuh pengerami Hari Raya enggau  pengerami bukai, taja pan enda sama bansa tang datai ngabang ngagai pangan diri, pia mega maya Gawai Dayak enggau Taun Baru China.

“Pementas enggau penyerakup ti baka nya patut terus dikemeran sereta dikemeratka di menua kitai tu ngambika kitai ulih idup dalam pemaik enggau pengelantang sereta maju.

“Baka sehari tu, kitai meda mayuh ke ukai bepengarap Islam sama datai ngerami Hari Raya, tu ngayanka penyerakup laban kitai nadai penanggul begulai enggau pangan diri,” ku iya lebuh bejaku seraya nutup seminar Keusahawan Industri Asas Tani (IAT) ke diatur Lembaga Pemasaran Pertanian Persekutuan (FAMA) ba Dewan Suarah Bau ditu, kemari.

Berebak enggau nya kemari, Opis Menteri iya bisi ngatur Majlis Ramah Mesra Aidilfitri MOA 2016 Parlimen Mas Gading, ke digulu pengabang enda  ngira bansa enggau jalai pengarap nyengkaum pesereta seminar.

Objektif Ramah Mesra Aidilfitri MOA 2016 diatur, dikena ngempuruka orang dagang sereta begulai enggau raban MOA.

Nambahka nya, pengerami nya mega dikena ngerapitka agi kaul entara Pemesai enggau pengereja pengawa di baruh Opis Menteri Betanam Betupi enggau Bumai, orang dagang enggau peranak ngelingi endur nya.

Orang mayuh ke datai ngagai Ramah Tamah nya disediaka mayuh macham pemakai, buah enggau utai irup kelimpah ari diperindang Intan Busker.

Berebak enggau nya Pengawa Nyuaka ‘Dermasiswa Bakti’ mega bisi diatur ke alai iya lapan ari 10 iku penerima ba sitak Parlimen Mas Gading  ke nyulut ba peresa perintah nerima insentif, RM600 seiku. Dermasiswa Bakti nya diatur ninting taun.

Sama bisi datai ba pengerami nya bini Nogeh, Caroline Jonathan Sabai, Kaban Kunsil Nengeri (ADUN) Tasik Biru Dato Henry Jinep, Direktor FAMA Paza Dan enggau ke bukai.