KUCHING: Dikena ngemujurka peminta nyerahka hak rayat nengeri tu ari perintah besai, Sarawak udah numbuka seraban komiti teknikal nyerahka kuasa nya ti betuaika Kepala Menteri Datuk Patinggi Tan Sri Adenan Satem.
Menteri ba Opis Menteri Besai Nancy Shukri madah, sebedau tu komiti teknikal ke sebaka bisi ditumbuhka perintah besai lalu iya enggau Dato Anifah Aman (Menteri Luar) bela nyadi kaban komiti nya.
Komiti teknikal nya deka bejalaika pengawa ngelala bagi atur ke ngelanggar hak enggau penuduk Sarawak dalam perintah besai, ke deka dipejuraika dalam ripot ti dipelaba dibantaika ngagai Kabinet ujung taun tu.
“Diatu Sarawak udah numbuhka komiti teknikal sida empu ke alai sida bejalaika tanggungpengawa (pasal peminta nyerahka hak Sarawak).
“Aku deka madahka komiti nengeri tu iya nya ti pemadu manah sereta sida udah besedia. Aku udah meda dokumen ti udah disedia lalu deka dipejuraika ngagai perintah besai.
“Aku arap bendar ngagai raban komiti teknikal Sarawak tu nentuka nama ti dikedeka ulih dikenataika ngagai perintah besai sereta ngarapka ulih dipejalaika enda lama agi. Baka ti dipadah YAB Kepala Menteri tadi, ti ngarapka bisi pekara diputuska lebuh manggai ba ujung taun tu,” ku iya.
Kaban Parlimen Batang Sadong meri penerang nya lebuh dikerandau pengudah ngulu pengerami nyambut Hari Sarawak 2016 ti diatur ba Waterfront Kuching ditu.
Pengerami Hari Sarawak 2016 udah mujur dipenyadi Tuai Megai Menua (TYT) Tun Pehin Sri Abdul Taib Mahmud sereta sama bisi digulu Kepala Menteri Datuk Patinggi Tan Sri Adenan Satem.
Komiti nya ditumbuh beduduk ari bisi pinta Perintah Nengeri Sarawak ti dekaka peminta rayat bekaul enggau autonomi nengeri ulih nyadi nyata.
Bejaku baru, Nancy madahka menteri ba perintah besai ke ari Sarawak endang udah lama bejaku ngarika nengeri tu.
Iya madahka diri temegah ati ngagai Menteri Besai enggau menteri bukai ba perintah besai ti ulih meretika aspirasyen Sarawak nyengkaum pasal peminta hak nengeri tu.
“Sarawak ba aku endang suah dikemeratka lebuh iya nyadi isu, dibantah tauka dikerandau, kami deka ngenukuka hak Sarawak terus dijaga,” ku iya.