Pemujur nguasa Jaku English ngemuntangka sida ngerebut peluang ba markit pengawa puang
// Dikarang Chris Bishop //
MERI LICHA: Lee (bediri ujung sekali) rambau pengawa OUM Icon Talk 2016 –Etiqueette and Sosial Media ke diatur ba OUM pampang Kuching ditu, kemari.
KUCHING: Raban graduet patut beratka pengelandik nguasa Bahasa English enggau manah ketegal pengelandik nya deka nentuka sida ulih ngerebut peluang ba makit pengawa puang, ku Aktivis rama ke mega Chairman Lembaga Direktor Open University Malaysia (OUM) Tan Sri Lee Lam Thye.
Ku iya, mayuh bala graduet enda mujur ba pengawa interbiu lalu nya ketegal sida enda ulih bejaku sereta nulis dalam Jaku English enggau betul.
“Aku udah suah ngelalau nembiak sekula sereta bala graduet ngambika ulih nguasa Jaku English enggau manah. Kitai meseti nguasa bahasa tu kelimpah ari Bahasa Malaysia enti deka nempa pemujur.
“Ambika banding di menua Singapura, bala nembiak sida nguasa tiga bansa jaku (English, Melayu enggau China). Sekeda nya nemu jaku Jepun enggau Korea.
“Tang ungkup kitai di Malaysia, chukup mih dua bahasa ketegal Bahasa English udah nyadi Bahasa Entarabangsa, ku iya.
Iya mansutka jaku nya rambau ‘OUM Icon Talk 2016 –Etiqueette and Sosial Media’ ke diatur di Open University Malaysia (OUM) pampang Kuching ditu, kemari.
Tajapia iya madah Bahasa Malaysia ke nyadi jaku menua patut seruran dipebasa ke alai bahasa nya mega udah mujur nempa penyerakup entara tetiap pupu bansa ditu.
“Tang kitai meseti bisi jaku kedua lalu jaku kedua di Malaysia sigi Jaku English,’tandu iya.
Ngenang kaul bukai, Lee madah OUM nyendia servis enggau awak nampung pelajar ngagai bala orang ke udah kereja.
Ku iya, awak nya ungkup sida ke ngembuan pengeran deka nampung pelajar ngambika bisi ngembuan diploma enggau degree.
“Ditu mih kitai nyendia pelajar seumur idup lalu pelajar tu chukup beguna ngagai menua kitai.
“Semua pengawa ke bekaul enggau ngemansang modal mensia begunaka pekara pelajar,” ku iya.
Di Sarawak OUM bisi tiga iti pampang iya nya di Kuching, Miri enggau Bintulu.
OUM Icon Talk 2016 –Etiqueette and Sosial Media kemari digulu lebih 200 iku nembiak OUM pampang Kuching.
Bela datai Mandal Presiden OUM Profesor Dr Shaari A Hamid.