Penyampau atlit ke nyulut ba Pekit Nyemerai majak nambah

0

Dikarang Jacqueline R. David

 

KUCHING: Pengawa Lumba Malaysia (SUKMA) ke- 18 ti diatur di Kuching, Sarawak bepun ari 22 ngagai 31 Julai tu, beratika pengawa lumba Nyemerai mujur ngayanka penyampau atlit nyulut ba Pekit Nyemerai majak nambah.

Menteri Nembiak, Lumba enggau Main Khairy Jamaluddin madah Malaysia deka beratika atlit SUKMA tu ngambi ulih ngarika kontinjen Malaysia ba ba Lumba SEA (Asia Tenggara) taun baru.

Sida ke bisi bulih  midul ba SUKMA Sarawak mega dipelaba deka ngarika menua ba Lumba Asia, Komanwel tauka Olimpik.

“Tu pemungkal sida iya, tu palan ke besai ungkup raban atlit biak mandangka pengelandik diri,” ku Khairy.

Iya madah munyi nya pengudah ngemataka Pekit Nyemerai renggat kepenudi sereta nyuaka perais ngagai bala pemenang ba Palan Akuatik ditu, kemari.

Nengah Sukma ke-18 mega beratika rikod baru mujur ditempa seiku atlit iya nya   Wong Foong Kang ke udah mechah rikod pengelama 20 taun. Sebedau tu, nadai seiku ulih mechah rekod nya dalam lumba nyemerai 100 meter ‘Breast Stroke’.

“Tu antara rikod ke udah manggai 20 taun pengelama, lalu aku melabaka mayuh rikod deka ulih dipechahka kitai baka ba lumba nyemerai 100 meter ‘Kuak Dada’ (Indu), 50 meter ‘Kuak Lentang’ (Indu), enggau 50 meter ‘Kuak Lentang’ (lelaki),” ku iya.

Kelimpah ari nya, Khairy mega meri terima kasih ngagai Perintah Sarawak laban udah ngemujurka pejalai Sukma sereta setiap atur naka kediatu, nadai betapi enggau sebarang penanggul.

“Beri puji sereta terima kasih ngagai Perintah Sarawak kelebih agi ngagai Komiti Pengatur  Sukma Sarawak ti bechairmanka Sekretari Perintah Nengeri Sarawak Tan Sri Datuk Amar Morshidi Abd Ghani.

“Laban naka diatu, semua pengawa bejalai enggau mujur kelebih agi demalam, maya bejadika Sukma XVIII ti digaga di Stadium Negeri Sarawak ti di gulu urung (dalam stadium aja udah penuh) 45,000, enda nyengkaum 20,000 lebih di luar stadium.

“Tu seiti pengawa ke rami endar ti bela digulu ulih pemesai Tuai Pemegai Menua TYT) Nengeri Sarawak Tun Pehin Sri Abdul Taib Mahmud enggau bini iya, Toh Puan Datuk Ragad Kurdi Taib, Kepala Menteri Datuk Patinggi Tan Sri Adenan Satem, enggau sekeda pemesai bukai, ke dipelabaka aku antara pengawa ke pengabis mujur dalam sejarah SUKMA,” ku iya.

Iya nandu baru, baka nya mega enggau penyendia ke semua palan alai betapat, penyendia genturung pendiau alai atlit bemalam sereta servis sukung ari sukut pengelikun, pemakai, pengangkut sereta pekara bukai.

“Aku beratika semua nya manah sereta nadai betapi enggau penanggul besai naka kediatu, bisi pan, nyangka ke mit-mit ke ulih dikemutarka enggau jampat baruh pegai komiti ti ditumbuhka,” ku iya.

Naka diatu mega ku iya, ari sukut pemakai sereta endur diau, pan sama dipuji udah disedia enggau manah .

“Semua penyendia endur diau ngemantupka ati lalu timbal ari semua kontinjen, pemesai, pematih enggau atlit meri timbal ke manah magang.

“Aku arapka kitai ulih ngetanka pemanah tu datai ngagai 31 Julai tu ila,” ku iya.

Ba Sukma XVIII seraj tu, Khairy madahka dalam lumba enggau main nya, bisi urung 1,455 atlet (tauka 33%) atlet ke ngarika menua ke agi dilatih baruh program atlet Kaunsil Lumba Nengeri (MSN.).

Khairy nandu baru, ari penyampau nya, 33% ke ba Sukma udah dipasuk ke dalam program MSN lalu laluh bukai nya, atlet renggat Nengeri ke dikelala bisi peluang besai, dilatih MSN kediri empu.

“Naka kediatu nadai sebarang bantah teknikal, lalu aku meri terima kasih ngagai MSN laban ke sekali tu nadai kes atlet ngerijista dua kali,” ku iya.

Sama bisi datai, Menteri Kaunsil Kandang Menua (PBT)  Datuk Dr. Sim Hui Kian, enggau Sekretari Perintah Nengeri Sarawak Tan Sri Datuk Amar Morshidi Ghani.