KUCHING: Sapit Kepala Menteri Datuk Amar Abang Johari Tun Openg sekali agi ngarap industri dagang temuai terus nyungkak penatai belanja ngagai Sarawak.
Berindik enggau nya, iya ke mega Menteri Dagang Temuai, Seni enggau Main Asal deka palan pematak temuai baka ke Taman Negara diangkatmanah lalu diintu enggau menyana agi.
“Semua palan pematak temuai patut dipejalai chara dagang tang ukai nyadika dagang nya seiti juluk ke berat ketegal kitai pan meseti nyendia servis ke bekualiti ngagai raban temuai,”ku iya ba aum pengarang berita di Begunan Baitul Makmur kemari.
Dikena nyapai juluk nya, Abang Johari madah seiti komiti ke digulu sekeda ejensi perintah enggau kompeni ke ngaul diri ba industri dagang temuai ditumbuh ngambi ulih ngadu pansik lalu bejalaika atur ke patut.
Ku iya, komiti deka berundingka chara pemadu engkeman endur ngangkatmanah Taman Negara seraya ke ngintu pemaik rampa menua ke alai perintah deka ngadu kerejasama enggau kompeni ba pengawa nyendia servis ngagai raban temuai.
“Enda semua kompeni ulih ngintu Taman Negara lalu sida patut ngembuan pengelandik sereta rinduka utai tumbuh enggau utai idup.
“Kompeni meseti ulih nyendiaka servis nitihka pinta kitai lalu nya mungkur pengawa ngiring raban temuai berengkah ari hari sida datai nyentuk ngagai pengujung penemuai sida,”ku iya seraya ke madah orang maling temuai patut ngemuan penau tinggi ba pengawa sida.
Abang Johari ke mega Menteri Pengawa Berumah enggau Urbanisasi madah komiti deka ngambi chunto ari atur ngintu Kinabalu Park enggau Tunku Abdul Rahman Park di Sabah lalu ngarap pansik ulih tembu sebedau Disember taun tu.
Iya nambah Taman Negara Bako, Semenggok enggau Gua Fairy di Bau dipilih endur ngadu ngepunka pengawa lalu deka dilanjar ngagai Taman Negara Lambir, Niah enggau Gunung Buda di Mulu.
Nitihka penerang ari Abang Johari, komiti diarika ejensi dalam Opis Menteri Dagang Temuai, Opis Kampung, Sarawak Forestry Corporation (SFC), Sarawak Tourism Board (STB) enggau Convention Biro.