Dikena nyeliahka sida terus beambi ulih ba tasik menua tu
MIRI: Kuasa perintah nengeri beguna dikena ngetuka pengawa salah guna Lisin Tasik Dalam (LLD) C2 ngagai bot tunda menua luar dikena nyeliahka sida terus beambi ulih ba kandang tasik menua tu.
Chairman Serakup Orang Berikan Miri, Kunsilor Jamali Basri madahka diatu bisi 81 buah bot tunda menua luar ari menua Vietnam, Thailand enggau China ti diberi lisin beoperasyen nadai sebarang tagang.
“Kitai minta perintah Sarawak ngaul diri dalam pekara bot menua luar ti diberi lisin tu. Nitihka runding kami ke berikan, bot menua luar tu pun ke bendar ngasuh utai idup di tasik kitai ditu punas,” ku Jamali nerang bekaul enggau pekara nya kemari.
Ke pemaik ngagai raban orang berikan enggau rayat, perintah nengeri dipinta ngetuka peminta lisin ungkup bot menua luar ke diatu ulih dikemaruka pengudah timpuh dua taun ari Opis Pengawa Berikan.
Pengawa bot menua luar ke diberi lisin dipelaba seruran bisi kenyau ari taun 90an lalu dikenangi enda ulih ditagang nyema pengawa nya enda diputar berengkah ari diatu.
“Ari penerang orang berikan kitai di Tanjung Manis, diatu bisi enam buah bot tunda menua luar nganti ngulihka lisin sida. Semua bot tu dipeda sikar enti dibanding enggau bot kitai,” ku Jamali nerang kemari.
Tanjung Manis nyadi palan nyangkaika asil berikan ari bot ke dipelaba semina laluh ari asil ke bendar. Iya mega dikelala nyadi pengkalan bot menua luar ke diberi lisin di Sarawak.
Jamali madahka sebagi ari asil berikan udah diambi bot menua luar ke bukai di tasik sebedau dianjung pulai ngagai menua asal sida.
“Asil berikan ke manah diambi sereta dianjung ngagai menua asal sida. Kitai semina nerima ikan sereta bansa ke enda manah aja,” ku iya.
Ngelansa enggau silik, tetiap bot dipelabaka ulih nangkap sepenyampau 50 ngagai 60 tan asil tasik dalam timpuh sebulan.
Kelimpah ari dipejalaika orang berikan menua luar, bot mega ngena servis orang gawa menua luar ke tan lama diau di tasik enti dibanding enggau orang gawa menua tu.
Orang berikan menua tu angkunka atur lisin iya nya nangkap ari pukul 6 pagi nyentukka 6 lemai kelimpah enda ulih ngachau utai idup di tasik ba kandang batu karang.
“Laban ke nadai peranak menua tu, bot menua luar deka ngerenchah sebarang alai ke bisi asil tasik nyengkaum ba kandang batu karang. Sida tu ke bendar ngerusak endur ikan diau. Sida ulih nangkap ikan kitai dalam timpuh 24 jam nadai ngetu,” ku iya nerang.
Jamali madahka rayat Sarawak betapi enggau pengerugi besai laban pengaya di tasik ke meri jereki ngagai orang berikan enggau pemansut pemakai ngagai rayat dirampas sepeneka ati rayat menua luar ketegal pengamu sebengkah piak ke bukai.
Enti sida nadai lisin, piak nyaga pengelikun deka muntang agi matau operasyen orang berikan menua luar ba tasik sereta enda ngeruga penatai pemisi orang berikan enggau pemansut pemakai pulaika pemaik ngagai rayat.