PEMADU NYULUT: Chairperson Serakup Indu Dayak Sarawak (SIDS) Sibu Dato Ir Alice Jawan ngelekatka selampai ngagai Manisa Tara ti mujur ngempu gelar Miss Talent BDCF 2016.
SIBU: Gelar Miss Talent Pengerami Mantaika Main Asal Dayak Borneo (BDCF) 2016 mujur diempu Manisa Tara sepengudah iya ngalahka semilan iku pemekit ke bukai ditu, malam kilah ensana.
Pengelandik iya ba atas panggau mujur matak undi ari bala akim.
Pemekit ke bukai ti bisi ngayanka diri maya tu iya nya Rafiella Benjamin, Lenny Amelina Ajub, Jina Jimmy, Presca Debbie Thomas, Dalina Bala, Maria Magdalin Simon, Nancy Ukat, Alice Rebut enggau Chrisyereen Kuing.
Sida sekali agi deka besemekih ngulihka gelar Kumang BDCF 2016 kena malam tu.
Gelar kumang deka mai pulai perais mata duit RM1,500 disempulang enggau trupi, selampai, jumpang enggau hamper lalu ditangkan lumur dua nerima perais mata duit RM1,200, trupi, selampai enggau hamper.
Penuduk lumur tiga deka mai pulai perais mata duit RM1,000 disempulang trupi, selampai enggau hamper.
Pemekit ke bulih lumur empat enggau lima mai perais mata duit RM500 enggau RM250.
Penuduk lumur enam nyentuk ke-10 mai perais saguati mata duit RM200.