Dikarang Rengenyan Labang//
KUCHING: Penyampau bantu ungkup penusah ngenyit nengeri tu deka diperatika sereta diubah baru, ti deka mungkur semua pekara ngambika setipak enggau ubah ke nyadi kemaya hari tu.
Menteri Pengintu Pengelantang Pendiau, Orang Indu enggau Komuniti, Datuk Fatimah Abdullah madah, peminta ubah bantu ketegal penusah ngenyit nya deka dikenataika ngagai kabinet nengeri ngambika ulih diperati sereta dikemeratka agi baka bantu bah, tanah tusur, ribut enggau ke bukai ti patut.
Surat pasal peminta ubah penyampau bantu nya kala udah dikenatai ngagai kabinet, tang perintah nengeri minta pekara ke dipasuk dalam ubah nya patut mungkur semua pekara, ku iya.
“Surat pasal (peminta ubah penyampau bantu penusah ngenyit) udah disediaka kami semina nganti gintir dibantai ngagai kabinet nengeri. Aum kabinet nengeri diatur sekali sebulan.
“Aku arap bendar perintah kitai deka berundingka silik pasal peminta kitai tu, laban ke bendar perintah nengeri mega ti minta ubah bantu nya mungkur semua pekara laban bantu penusah ngenyit tu mungkur kereban dikena berumah, kereban enggau gari sekula enggau ke bukai.
“Kitai nemu rega kereban dikena berumah diatu pan udah niki, kitai enda ulih ngena penyampau ke lama agi,” ku iya lebuh dikerandau raban pengarang berita.
Dulu ari nya Fatimah nyuaka bantu ngagai orang ti tasah ketegal ribut balat ti ngerusak sereta nerebaika sekeda perabung rumah kena 6 Julai tu tadi, ba Jalai Permata 1 ditu, pagi kemari.
Kemari, lima iku sida ke tasah ketegal kabut balat nya betapi enggau pengerusak rumah ke balat nerima bantu kereban berumah sepenyampau RM2,500 sepintu, kelimpah ari nya sebedau tu sida mega udah diberi bantu mata duit.
Nambahka nya bisi lima agi ke senasib tasah ketegal kabut nya tang rumah enda balat rusak mega bisi diberi bantu kereban dikena ngaga rumah. Lalu seiku agi enda diberi bantu kereban berumah berindik ari iya semina penyuwa rumah.
Ku iya, penyampau bantu ke diberi diatu baka kereban dikena berumah ke tiap pintu bilik ke kena penusah kabut iya nya RM2,500 lalu bantu mata duit tekala nya RM40 ke tiap iku ti tasah kelimpah ari kereban sekula sereta barang dapur.
“Penyampau bantu kereban berumah RM2,500 (ke sepintu). Ambika chunto kes penusah angus di Rumah Jalak apin lama mega nerima RM2,500 (taja pan rumah nya angus magang).
“Nya kebuah kitai patut bisi penyampau bantu ke baru. Lalu dalam penusah ti baka nya, bantu tekala nya baka dikena map perabung patut ulih diperundingka nyadi bantu,” ku iya seraya madahka nya kebuah ubah bantu ke dipinta nya deka mungkur semua pekara.
Sama bisi datai ngemataka pengawa nyuaka bantu nya kemari, Menteri Kunsil Kandang Menua Datuk Prof. Dr. Sim Kui Hian sereta Kaban Kunsil Nengeri (ADUN) Batu Lintang See Chee How enggau ke bukai.