KUCHING: Opis Menteri Pengintu Pengelantang Pendiau, Orang Indu enggau Pengelantang Komuniti enda ngetu ngansak ‘definisyen bajau’ diubah sereta dikearap bisi dipasukka dalam Akta Nembiak Mit (Ubah) 2016 ke udah digazet pengudah dikemendarka Yang di-Pertuan Agong Tuanku Abdul Halim Mu’adzam Shah ensanus.
Menteri iya, Datuk Fatimah Abdullah madahka opis menteri iya ti ngarika perintah nengeri minta Peguam Negara perintah besai ngubah undang-undang kelebih agi bekaul enggau definisyen bajau patut lebih holistik.
Saut ke diterima ari Peguam Negara (Tan Sri Abdul Gani Patail) maya nya suba iya nya sebengkah ubah bekaul enggau Akta Kanak-Kanak deka digaga sereta lebih mungkur pekara ti lebih besai, (nyengkaum batang pekara besai), ku iya.
“Aku (opis menteri) bedau meda pekara nya (Akta Kanak-Kanak (Pindaan) 2016) enggau silik, sekalika pekara ke dipinta kitai sebedau tu dipasukka tauka enda, baka ti dipadahka Peguam Negara (ubah akta deka nyengkaum definisyen bajau). Tauka engka dibaruh Kort pengawa jai.
“Lalu nyema enda disengkaum, udah tentu kitai balat asa ati laban nya (ubah definisyen bajau) ke dipinta lalu kitai mega bisi minta kaban parlimen ari nengeri tu mantaika kes tu di parlimen,” ku iya ti ngarapka definisyen bajau disengkaum dalam Akta Nembiak Mit (Ubah) 2016.
Fatimah dikerandau lebuh ke datai nyuaka bantu kereban berumah ngagai orang ti tasah ketegal kabut balat ba Jalai Permata 1 ditu, kemari.
Ensanus di Putrajaya, Akta Nembiak Mit (Ubah) 2016 ti bisi empat batang peakra besai – Rejista Nembiak Mit; Perintah Servis Mensia Mayuh (CSO); Nyaga Bepelasarka Ruang Bilik enggau Peniki Penyampau Penalti, digazet pengudah dikemendarka Yang di-Pertuan agong Tuanku Abdul Halim Mu’adzam Shah.
Menteri Pemansang Orang Indu, Ruang Bilik enggau Raban Bansa Datuk Seri Rohani Abdul Karim ensanus madahka opis menteri iya deka ngatur kimpin penyedar dikena nentuka raban bansa enggau semua ejensi nyikap diri sebedau akta nya dipejalaika.
Fatimah bejaku baru madahka definisyen bajau nya patut diubah baru ngambika orang indu ti dibajau tauka kelebih agi orang ke majau nya enda lepas ari undang-undang.
Iya enggaika kes ti kala nyadi sebedau tu nyadi baru ketegal definisyen bajau ti enda besai bungkur.
“Kitai deka ubah nya (definisyen bajau) ngambika orang indu ti dibajau enggau orang ke majau deka nerima ukum ti setipak, kitai enggai pesalah lepas ari undang-undang ketegal definisyen, laban nya nyiping orang indu ti dibajau.
“Ambika chunto kes sebedau tu, orang indu ti dibajau nya udah ngadaka anak lalu ari nya kitai nemu indu nya dibajau tang ketegal definisyen bajau sereta bisi luyar ti pandai iya ngena definisyen nya, lalu ngujungka pesalah tauka pemajau nya lepas ari undang-undang,” ku iya ti agi nganti tauka ngarapka bisi ubah ba definisyen bajau (Bajau Reti nya masung lalu ngulihka tubuh indu – Bup Sereba Reti Jaku Iban TJF).