Dikarang Magdeline Janin//
BEJADI: (Ari kiba) Jackson Melintang, Douglas Pungga, David Dian, Sumbang enggau Ugak ngetas riben tanda bejadika pengawa pengerami nya.
Pemansang nya deka dipejalai nengah mayuh bengkah program tranformasyen ti udah diperambu perintah
KAPIT: Pemansang ba sitak Hulu Rajang deka terus dikemansangka dalam kandang lima taun ke deka datai tu nengah mayuh bengkah transformasyen.
Kaban Parlimen Hulu Rajang, Datuk Wilson Ugak Kumbong lebuh ngulu Program Ketuai Begulai enggau Rayat ba Rumah Sumbang, Nanga Selaut apin lama ke udah madah, dalam kandang lima taun ke deka datai tu ila, semua serata menua Sarawak tu deka digaga jalai alun ti lalu nyambung ngagai jalai besai.
“Dalam kandang lima taun ke deka datai, serata menua ditu deka digaga jalai alun. Perintah enda ulih madah jalai tu mar digaga enti dibanding enggau Semenanjung Malaysia. Nama kebuah ba menua kitai enda ulih enti ba Semenanjung jalai digaga begembar?. Chunto iya baka ba Pulau Pinang.
“Kitai bisi tekat hidro ba menua diri empu. Ambika chunto baka Tekat Bakun, SEB (Sarawak Energy Berhad) dalam sehari bulih penatai pemisi RM10 Juta. Tekat Murum mega ulih ngasilka RM5 Juta dalam sehari laban mekal kuasa karan ngagai kandang industri,” ku iya
“Enti sema tekat ba menua kitai tu mujur digaga aku arapka tetiap buah rumah panjai di Batang Baleh tu dibekal kuasa karan magang,” ku iya
Kelimpah ari nya, iya bisi madahka diri ninga ari kompeni di menua tu ke tebal agi mai orang ari menua luar gawa ba kompeni sida lalu mayar gaji ke mimit ngagai peranak menua tu.
“Aku enggai sesekali meda pekara tu nyadi. Peranak menua kitai ke gawa diberi sida gaji mit agi enti dibanding enggau pengereja pengawa ari menua luar. Enti nitihka gaji peranak menua tu patut besai agi dibanding enggau sida ari menua luar nitihka gaji ti udah ditetapka perintah menua tu,” ku iya
Kelimpah ari nya, iya mega bisi ngenang pasal PRN Ke 11 ti diatur apin lama ke udah, ke alai iya muji rayat ba sitak Balleh ketegal bisi pengarap ke manah ngagai BN.
Nengah awak nya mega iya bisi ngenang pasal subsidi ke patut iya diberi ngagai rayat di rumah panjai. Subsidi tu ke ari baruh kuasa KPDNK patut ulih mutarka penanggul rayat.
Sama bisi datai maya nya, Pemesai Opis Pelilih Bukit Mabong, Douglas Pungga, Pemesai Khas Sapit Menteri Besai, Kunsilor Jackson Melintang Budit, Sapit Pemesai Opis Tenaga Kerja, Khusairy Pangkas, Pemesai Kanan Bomba, Sengiang Usat, Pemancha David Dian, Penghulu Salang, Penghulu Bunsu, Penghulu Steward Sawing enggau bala tuai rumah sereta ke bukai.