Pengawa tu chukup manah ngambi meransang sida meras agi ngemansangka pengawa dagang
// Dikarang Judan Bungap //
TEKAIT ATI: Tiong mandangka pemanah duku ti bisi dijual maya karnival nya kemari ngagai Hii.
SIBU: Pengeransing Opis Pengintu Pengelantang Pendiau Mensia Mayuh (JKM) ti ngempung orang dagang mit nengah pengawa ngatur program bejual produk sebengkah jalai ti engkeman ngangkatka raban tu.
Kaban Kunsil Nengeri (ADUN) Dudong Datuk Tiong Thai King madah, pengawa baka tu mega tau bendar meri peransang ngagai orang dagang mit meras agi ngemansangka pengawa sida sereta enda kelalu bepanggai ba bantu ari orang bukai.
“Kebendar iya, orang dagang mit ditu patut berasai temegah ati laban sitak Sibu menua ti suah alai temuai datai baikka ari menua tu empu tauka menua luar.
“Nambahka nya, Sibu mega nyadi pintu penama zon tengah ngelawa nengeri Sarawak.
“Nya alai, semua orang dagang patut beambi ulih ari pengelebih tu,” pia ku iya madah.
Iya mantaika jaku tu maya bejadi Mini Karnival Usahawan Mikro Kebajikan 2016 Zon Tengah di Wisma Sanyan ditu, kemari.
Bekenangka karnival ke diatur nya, ku Tiong, karnival tu deka ngerandang awak ke manah agi nga-gai orang dagang mit ngemesaika makit dagang sida.
“Ngarapka sida nemu bekenaka awak ke ditempa JKM tu,” ku iya madahka baru.
Tiong bekenaka awak tu meda sereta meli beberapa bengkah produk ke bisi dijual maya nya.
Sama bela bisi datai maya tu iya nya Direktor Opis Pengintu Pengelantang Pendiau Mensia Mayuh Nengeri Abang Shamshudin Abang Seruji, Residen Sibu Hii Chang Kee enggau Te-menggung Stanley Geramong.