Licha SMGA: Ngeluruska penyaru ba sejarah ngagai peranak Sarawak

0

KUCHING: Ikatan Graduan Melayu Sarawak (SMGA) kemari ngadu licha endur nerang sentang sejarah sereta pekara ke amat nyadi maya 22 Julai 1963.

Kenyau diangkat nyadi maya ke dikeingat dalam sejarah Sarawak ba taun 2013, haribulan nya ukai semina tebilang tang mega bela nyadi kontrovesi ungkup peranak Sarawak sereta Malaysia.

Licha pengelama dua jam dikemujur presiden SMGA, Datuk Dr Sanib Said ke nyadi sejarahwan Sarawak ti bejuraika “22 Julai 1963: Antara Fakta dan Dusta”.

Nitihka penerang ari Sekretari Besai SMGA, Samsol Morshidi Bujang, licha diatur enggau tuju nangkup pinta Perintah Nengeri ti dekaka raban orang sejarah nerangka 22 Julai 1963.

“Kitai ke nyadi sejarahwan kelebih agi Dr Sanib ngenggaika peranak Sarawak sereta Malaysia saru enggau haribulan nya ke udah nyadi seiti sejarah,’ku iya lebuh dikerandau tembu licha.

Kelimpah ari licha, Samsol madah SMGA bisi ngadu pentomin tetiap 22 Julai berengkah taun 2014 ngambi ulih nusui jerita ke nyadi sejarah besai Sarawak sebedau Malaysia ditumbuh.

“Tajapan enda mayuh bansa datai mendingka licha ti keterubah kitai tu, tang kitai udah nyapai juluk ke ditetap lalu tu mandangka mayuh orang deka nemu sejarah Sarawak.

“Kitai deka ngerembaika agi program tu ngagai Palan Pematih Pengajar (IPG) kelimpah meri penerang sentang Sempekat Malaysia 1963 (MA63) ari sukut sejarah nengah chara mai sejarahwan kitai empu, Dr Sanib,” ku iya.

Dr Sanib ba licha nya madahka pansik ba dokumen rasmi, surat berita Sarawak enggau gambar nyadika bukti tegap Sarawak bedau merdeka maya 22 Julai 1963.

Ku iya tuduh ti madahka 22 Julai 1963 nyadi maya Sarawak merdeka, seiti tuduh bula ketegal nadai bukti.

Berindik enggau nya iya pechaya Hari Sarawak engka engkeman agi dikena ngingat 22 Julai 1963 ketegal maya nya kepala Menteri enggau Kabinet Nengeri keterubah udah dichiri lalu ukai Hari Merdeka baka ke udah digazet.

Urung 100 iku orang datai mendingka licha ke diatur di Pusat Sumber Tun Openg, Jalai Ajibah Abol ditu.