NGANGKATKA UMK: Tiong (tiga kiba) disempulang Abang Shamshudin (dua kanan) seraya dikemata bala bukai maya Pengawa Bejadi Karnival Usahawan Mikro Kebajikan 2016 Zon Tengah di Wisma Sanyan, kemari.
SIBU: Opis Pengintu Pengelantang Pendiau Mensia Mayuh (JKM) deka ngubah strategi dikena ngangkatka pengidup orang ti nerima bantu ninting bulan ari JKM nyadi orang dagang ti bepenatai pemisi ti manah.
Direktor JKM Nengeri Abang Shamshudin Abang Seruji madah, mayuh orang ke nerima bantu ari JKM agi regas sereta bisi awak dikemansangka.
“Nya alai, kitai deka ngatur tauka ngaga strategi ti ulih meri awak ngagai sida nyadi orang dagang ngambika pengidup sida deka meruan agi jemah ila,” pia ku iya madah.
Iya bejaku munyi tu maya Pengawa Bejadi Karnival Usahawan Mikro Kebajikan 2016 Zon Tengah di Wisma Sanyan, kemari.
Pengawa nya dipenyadi Kaban Kunsil Nengeri (ADUN) Dudong Datuk Tiong Thai King.
Nambahka nya, ku iya, sekeda ari program ti dikena bejadika juluk ati tu iya nya ngelakuka produk tauka asil ari sida ngagai tikas ti manah agi.
“Ketegal tu kitai ngempung urung 30 iku orang dagang ari sitak Kapit, Sarikei, Betong enggau Sibu bela ngambi bagi ba karnival tu ngambika sida ulih bejual sereta ngelakuka produk ke digaga sida.
“Produk sida tu digelar kitai WellBest lalu sida mega nyadi orang dagang tauka Usahawan Mikro Kebajikan (UMK),” ku iya nambahka baru.
Bela datai maya tu iya nya Residen Sibu Hii Chang Kee enggau Temenggung Stanley Geramong sereta bala bukai.