Pelajarka pengelandik nguasa Jaku Inggeris enggau manah laban jaku nya dikena di serata dunya
// Dikarang Chris Bishop //
KUCHING: Sepenyampau 326 iku orang nyengkaum raban nembiak sekula, orang gawa ba ejensi perintah sereta kompeni mujur nembuka program Jaku Inggeris 1Malaysia (BI1M).
Program pengelama 4 bulan nya diatur Palan BI1M Kuching, berengkah ari pengujung bulan April lalu tembu kena 29 Julai 2016.
Pengawa nyuaka setipikit tembu program ke diatur kemari ba Palan Bebeli Barang Riverside Kuching dikemujur Menteri Muda Pemansang Infrastruktur Datuk Talib Zulpilip.
Ba jaku nutup program, Talib meransang semua, ukai semina raban nembiak sekula ngambi belajar lalu nguasa Bahasa Inggeris enggau manah.
“Nguasa Jaku Inggeris enggau manah chukup beguna amat laban kitai idup ba dunya, begulai enggau mayuh bansa.
“Inggeris udah nyadi jaku ke diguna diserata menua lalu nya kebuah kitai meseti belajar Jaku Inggeris,”ku iya ke mega Chairman SEDC.
Dulu agi ari nya, Menijar Palan BI1M Kuching Andrea Kobor madahka program nya dibagi ngagai 18 kelas, iya nya 7 kelas asas sereta 11 kelas komunikasyen.
Ku iya, palan nya nyadi endur 500 iku orang bulih awak ngansah pengelandik Jaku Inggeris lalu 326 iku mujur nembuka program kemari.
“Kelimpah mulaika pemaik ngagai nembiak sekula, BI1M mega nguntungka komuniti ditu ke alai kitai udah mujur ngatur empat projek komuniti ti bekaul enggau pengawa belajar Jaku Inggeris,’ku iya.
Program nadai bebayar nya nyadi sebengkah inisiatif Perintah nengah National Blue Ocean Strategy (NBOS) dikena ngemansang menua, baikka nya dalam kandang mengeri tauka di menua pesisir.