Semina nengah penyerakup, kerejasama serak raban bansa ulih ngemujur sebarang perambu pemansang
DEBAK: Perintah deka meda genap serak raban bansa nyengkaum gerempung sereta serakup terus begempung segulai sejalai enggau pangan diri dikena nerenakka ayu pengelantang.
Nya alai, semina nengah penyerakup enggau kerejasama ulih ngemujur sabarang perambu ke deka dipejalai perintah dalam ngaduka pemansang, ku Sapit Kepala, Datuk Amar Dauglas Uggah Embas.
Kenu ku iya, begembar enggau juluk kitai nyapai pemansang ke lebih manah, kitai patut begempung sereta ngembuan ulah bebasa ke pangan diri nadai ngira renggat umur.
“Perintah endang seruran merambu mayuh bengkah program ungkup rayat ngambika sida terus ngasaika pengelantang seraya madah deka nyediaka mayuh pengawa puang,” ku iya.
Iya ke mega nyadi Menteri Betanam Betupi Moden enggau Ekonomi Menua Pesisir madah munyi nya rambau Pengerami Makai Selamat Pemujur Barisan Nasional (BN), PRN ke-11 enggau Rumah Tebuka Ramah Tamah Aidilfitri sereta Gawai Dayak 2016 Renggat DUN Saribas ba Dewan Perpaduan Debak ditu, ensanus.
Nya alai, ku iya dikena ngerebut peluang nya, rayat patut nguna bemacham alternatif baka perengka laman rama nengah internet kelimpah media bukai nyengkaum surat kabar.
“Kita patut tebuka runding sereta pintar IT (Teknologi Pemadah),” ku iya.
Ku iya, dunya diatu majak moden sereta begunaka orang ke landik ba bidang ICT. Nya alai, dikena nangkup peluang nya, untak rayat sereta runding sida patut berubah setipak enggau ubah ke maya hari.
Uggah ba maya nya madah, taja dunya diatu majak moden, iya ngarapka bala nembiak tauka penguna internet laman rama baka facebook, twiter enggau ku bukai anang nguna iya enggau chara ke enda betul.
Tang patut nguna perengka nya enggau manah dikena meri pemaik baka nambahka penatai pemisi penguna empu, ku iya.
Berebak enggau nya, Uggah madah rayat patut meri terima kasih ngagai semua utai ke diasaika diatu asil ari pegai perintah Barisan Nasional ke betuaika Menteri Besai Datuk Seri Mohd Najib Tun Razak.
“Rayat patut ngetanka penyerakup pupu bansa sereta ngemeranka konsep 1 Malaysia awakka menua tu terus likun sereta lantang,” ku iya.
Sama bisi datai iya nya Kaban Kunsil Nengeri Saribas, Mohamad Razi Sitam, Sekretari Politik Sapit Kepala Menteri, Dr. Richard Rapu, Sekratri Opis Kaunsil Pelilih Betong, Bujang Ladi, Pemesai Pelilih Mit Debak, Dr. James Luing, Temenggong Bansa Melayu Betong, Piee Alwie enggau ketuai opis perintah ke bukai.