SRDC dilalau regas ngiga belanja kena ngaga pemansang infrastruktur

0

// Dikarang Judan Bungap //

SIBU: Opis Kaunsil Menua Pesisir Sibu (SRDC) dilalau chakah ngiga chara dikena nambahka belanja opis sida ngambika mujur ngaga mayuh agi pemansang infrastruktur ba kandang menua ke dipegai.

Sapit Kepala Menteri Tan Sri Datuk Amar James Jemut Masing madah, menua ke dipegai SRDC bangat besai iya nya mungkur lima iti Kaunsil Nengeri (DUN) lalu enda semua udah disikap enggau chukup pemansang baka jalai alun.

“SRDC megai menua ti besai iya nya mungkur DUN Dudong, Tamin, Nangka, Bawang Assan lalu bisi ngerampit mimit ba DUN Kakus.

“Ari pemesai menua tu SRDC meseti berundingka chara ngiga belanja ngambika ulih ngaga projek infrastruktur,” pia ku iya maya aum media.

Dulu agi ari tu iya ngemataka Pengawa Nyiri Chairman enggau Sapit Chairman sereta Raban SRDC ditu, lemai kemari.

Sama bela bisi datai maya tu iya nya Menteri Muda ba Opis Kepala Menteri (Undang-undang enggau Adat Bumiputera) Datuk John Sikie Tayai, Kaban Kunsil Nengeri (ADUN) Dudong Tiong Thai King, ADUN Tamin Christopher Gira Sambang, ADUN Pelagus Wilson Nyabong enggau Sekretari Politik Kepala Menteri Edwin Banta sereta bala bukai.

James ti mega Menteri Pemansang Infrastruktur enggau Perengka Pengangkut madah, seiti ari chara ke engkeman digaga SRDC diatu iya nya ngaga bayar paking kerita.

Chara nya ku iya, udah lama dikena Opis Kaunsil ke bukai ba serata nengeri dikena sida ngiga belanja.

“Kelimpah ari nya, kita mega tau beratika baru penyampau bayar pupu sebedau tu, engkeman ke enda penyampau bayar pupu nya diubah baru,” ku iya madah.

Dulu agi ari tu, maya ke bejaku ba mua mayuh, James pechaya rintai baru raban SRDC ulih ngubah tikas pemanah servis sida ngagai rayat.

Ku iya, taja enda sama penatai baikka ari pelajar, peneleba enggau parti politik, SRDC ulih mujur megai tanggungpengawa enti sida bela bekempit enggau pangan diri.

Kelimpah ari nya, James mega madahka udah maya iya alai SRDC ngaga opis kediri baikka di Sibu Jaya tauka di Selangau ari ke besaum enggau orang bukai sebedau tu.

Ba pengawa tu, Sempurai Petrus Ngelai besumpah mangku pengawa nyadi Chairman lalu ditangkan Robert Lau Hui Yew nyadi Sapit Chairman.

Bala kunsilor ke bukai ti sumpah mangku pengawa maya tu iya nya Teo Boon Siew, Ting Hua Kuok, Jeffery Nuing Ebom, Amping Ranggau, Ho Kok Munting @ Munting Eja, Tang Tung Kwang, Donald Gilbert Muntie, Suliman Supit enggau Tiong Chee Jye.

Tu ditangkan Loh Ling Tai, Phuang Ton Hing, Lau Kwong, Kong Yii Tee, Kong Chek King enggau Ladong Engkol.

Nangkan ke sida, Frederick Taip Ledom, Ting Wie Teng, Geronsin Maja, Lipan Jalani, Anthony Lidom, Christopher Kusa Buan, Dali Merawing, Badie Ujan enggau Chabu Rimao.

Bela bereta maya tu mega iya nya Kalai Tugang, Halima@Halimah Japar, Belawan Daut, Ubang Pandong enggau Mathews Chuat Seribu.