Dennis: Nembiak mit belajar ari pekara ti dipeda sida

0

MARUDI: Bala nembiak mit ba pelajar tumu deka belajar mayuh agi ari pekara ti dipeda sida.

Nya alai, beguna endar piak sekula ngatur aktiviti baka lumba enggau main ungkup bala nembiak mit nentuka sida belajar ngereja pengawa beraban, bisi pengeransing enggau pengeliat. Tu peluang ngagai bala pengajar ngembing sida enggau teladan.

Nyema pengajar nya ngelusu, enda ransing ati, dia bala nembiak diajar iya deka nunda. Nya alai, gaga pengawa ti menyana laban pekara tu enda ulih diseliah. Bala nembiak mit ngelempaika pekara pelajar pengidup sida ba pengajar kelimpah ari belajar di rumah.

Dennis Ngau meri besai terima kasih ngagai semua bala pengajar enggau staf sukungan ti dianjung gawa ba sekula di Telang Usan ketegal pengawa sida ngajar bala nembiak di menua entigis ditu.

Ukai semina bejalaika pengawa sida aja tang mega ngena awak enggau belanja diri ungkup pemaik bala nembiak di sekula. Mayuh orang enda meda nama pengawa ke udah dikereja bala sida, tang Dennis pechaya Tuhan bisi ngemata semua nya.

“Uji perati endur kita gawa ditu enggau sida ti sama gawa di mengeri, nyauka bisi penyuntuk ba semua pekara ditu.

“Aku bisi meda pengeransing bala kita dekaka bala nembiak teulihka penyulut dalam pelajar enggau pengidup dudi hari.

Kaban Kunsil Nengeri (ADUN) Telang Usan, Dennis Ngau mansutka jaku tu lebuhka bejaku ba Lumba Ninting Taun Sekula ungkup tiga buah sekula di Zon Bagi Menua Ulu bepalan ba Sekula Primari (SK) Long Apu, Ulu Baram apin lama ke udah.

“Aku nyamin 100 peratus penusah ti ditapi bala kita di menua pesisir ditu alai kita enda ngasaika diau lantang ba kuarters enggau perengka ngajar nempa kita nyadi pengajar ti nyulut.

“Dianjung gawa ditu sebaka enggau kita betapi enggau pemar ti deka nempa kita nyadi pengajar ti menyana.”

Ngagai bala nembiak, lumba tu ukai semina berundingka diri deka menang tang nempa tiga pekara ti beguna endar dalam pengidup; pengerai tubuh ti ngemai pengerai runding, nerenak semangat besemekih ngemai reti anang mudah mantul, sereta disiplin diri.

“Nadai sapa di dunya tu ulih nyapai penyulut enti nadai disiplin. Tu mih pun pengidup nyema nuan deka ngasaika pengidup ti menyana maya besai jemah.”

Bala apai indai enggau pengajar meseti seruran ngiga chara ngaul diri ba atur aktiviti dikena ngangkatka pemanah rampa sekula.

Ba program nya, Dennis bisi ngemendarka geran Projek Mit Pemansang Menua Pesisir (MRP) penyampau RM10,000 ngagai PIBG SK Long Apu, RM7,000  ngagai PIBG SK Long Palai enggau SK Long Anap.

Tuju lumba diatur ninting taun ungkup tiga buah sekula ari baruh pegai Zon Baram Ulu (SK Palai, SK Anap, enggau SK Apu)  dikena milih bala atlit ti deka ngarika zon nya dalam lumba Zon Ulu Baram deka diatur ba SK St Pius, Long San dalam bulan October.

Lebih ari 100 iku nembiak sekula nyereta lumba ke diatur empat hari berunggu.

Sama bisi datai Sekretari Politik Kepala menteri Sarawak Charles Balan Seling, Kepala Pengajar SK Long Apu Anyi Ak Jana, Pemancha Henneser Uning Bong, Penghulu Joseph Belulok  enggau Tuai Kampung Long Apu Peter Tingang.