Tu mega dikena nimbal peminta Sapit Menteri Besai ke ngasuh kitai seruran bejejaga ba Bulan Oktober
// Dikarang Jacqueline R. David //
KUCHING: Perintah Nengeri nengah Komiti Pengatur Penusah Rama Nengeri Sarawak (JPBNS) udah besedia napi penanggul ke nuntung mensia mayuh kelebih agi maya musim landas ti dipelaba nyadi dalam kandang tiga bulan tu ila.
Sapit Kepala Menteri ti mega nyadi Chairman JPBNS Datuk Amar Douglas Uggah Embas madah pekara tu mega nimbal aum ti bisi bechairmanka Sapit Menteri Besai, Datuk Seri Ahmad Zahid Hamidi ba aum Komiti Besai Pengatur Penusah Rama (JKTPBP) Bil 2/2016 kena 12 Ogos tu tadi, ke besetuju ngelar bulan Oktober ninting taun nyadi ‘Bulan Kesiapsiagaan Nasional’ ke ngena jaku rambai ‘Siapsiaga Bencana Tanggungjawab Bersama’.
“Berindik ari nya, semua residen, pemesai opis pelilih menua sereta ketuai ejensi Opis Perintah ke bekaul enggau pemerat merambu sereta ngaga program penyendia dikena napi penusah ke enda disadang sepemanjai Bulan Oktober 2016,” ku Uggah.
Iya madah munyi nya ba aum media ti digulu ulih tuai-tuai ejensi opis perintah kelebih agi ejensi ti dipegai baruh Opis Kandang Menua (PBT) di Opis Operasyen Nengeri di Wisma Bapa Malaysia ditu, kemari.
Tuju aum nya digaga, iya nya meri kelala chairman JPBN ke baru (nganti ex-sapit kepala menteri Datuk Patinggi Tan Sri Alfred Jabu), iya nya Datuk Amar Douglas Uggah Embas empu, lalu sapit chairman JPBN sebedau tu Datu Misnu Taha diatu diganti enggau Sapit Sekretari Perintah Nengeri (Transformesyen Menua Pesisir) Datu Jaul Samion.
Aum nya mega ngelai menua tu besedia napi sebarang penusah ke bisi nyadi sereta ngambi atur ke patut begulai enggau opis sereta ejensi ke bisi bekait enggau pekara tu, beratika injin pengatur tasah di semua renggat bejalai enggau lanchar.
Ba aum nya mega, bisi madahka pemayuh penegap raban JPBN ke bisi dalam 17,100 raban sereta pegawai ke nyengkaum ejensi (raban keterubah) maya bisi tasah, iya nya, Raban Penyaga Pengelikun Mensia Mayuh (APM) ti mega nyadi sekretariat JPBN (5,000 iku pemesai enggau raban ke ulih diasuh mantu dalam sejam keterubah), soldadu (7,192 pemesai enggau kaban bukai), PDRM (1,344 iku pemesai), Bomba enggau Penyah Penusah (1,343 iku), Opis Rela Malaysia (1,089 pemesai enggau ke bukai – Crisis Management Team) enggau Opis Pengintu Pengelantang Pendiau Raban Bansa (JKMS) 1,129 iku pemesai, kaunsilor enggau volunteer.
Ba penegap logistik JPBN, bisi lima buah bilun engkabang, 154 lori, 358 kerita pikap (4WD), 226 bot enggau 50 ambulans ti ulih dikena di serata menua tu.
Uggah ti mega nyadi Menteri Pengawa Betanam Betupi enggau Ekonomi Menua Pesisir nandu, dikena napi maya tasah, JKMS naka bulan Julai 2016, udah begunaka belanja urung RM2.8 juta ungkup 62,514 mensia mayuh ke ditinggang penusah rama baka ampuh bah, kabut, tanah tusur, kemarau enggau angus.
“Lalu ba sentang ungkup ari wang turu tasah menua, Ejensi Pengatur Penusah Rama Menua (NADMA) mantu mensia mayuh ke betapi enggau ampuh bah ti diputarka APM Sarawak ke nyadi sekretariat, urung 20 pengawa magi udah dipejalaika ngagai 3,626 ketuai bilik ampuh bah renggat keterubah, enggau penyampau ungkup urung RM1.8 juta lalu laluh dalam 7,008 ketuai bilik ke kena tinggang penusah ampuh bah renggat kedua enggau ketiga enggau penyampau ungkup urung RM3.5 juta deka dibagi dalam bulan Oktober tu,” ku iya.
Sama bisi enggau ngulu aum media nya kemari, Menteri Pengintu Pengelantang Pendiau, Orang Indu enggau Komuniti, Datuk Fatimah Abdullah enggau ketuai opis sereta ejensi perintah ke bukai.