// Dikarang Jacqueline R. David //
KUCHING: Industri MICE (Meeting, Incentive, Conference and Exhibition) seiti ari industri ke pemadu beguna ngagai nengeri tu nyengkaum pengawa dagang, pengangkut, wang sereta pengawa raun.
Rektor UiTM Kampus Samarahan, Sarawak Prof Dato Dr Jamali Hamali madah industri bansa tu mai orang begulai, betemu mua, betukar penemu sereta pemadah, kelimpah ari bejuraika sekeda pekara ke patut diperunding, ngaga penyambung sereta meransang ngaga asil pengawa ke manah agi.
“MICE mai penguntung ke mayuh, puku ke ulih diperanak jemah ila, ngurangka pangka negatif dalam pengawa dagang temuai sereta aktiviti ke ulih digaga sepemanjai taun,” ku Jamali madah nengah teks jaku iya ti dibacha seiku lecture ke mega nyadi penyanding penemu ngagai atur pengawa ke digaga ulih seraban nembiak UiTM ke ngambi kus Degree dalam Pengawa Dagang Temuai, Nuraini Putit, lalu digulu urung 100 iku nembiak ari kus nya di sebengkah hotel ditu kemari.
Ku Jamali nandu, dalam bulan OKtober ila, bisi seiti atur pengawa Konferen Eko Dagang Temuai Asia Pasifik ke-9, 2016 (APECO) ti digaga di Kuching.
“Atur pengawa tu nyendiaka seiti palan ke manah, meri penemu ngangkatka standard dagang temuai eko dalam industri dagang temuai sereta peluang meri penemu, bekunsi sereta betukar penemu pasal dagang temuai eko.
“Atur pengawa tu ulih matak mayuh orang industri dalam enggau menua luar, nyendiaka peluang dalam pengawa dagang temuai eko. Tu mandangka Kuching, sebuah mengeri besai ke tebilang alai MICE begempuru antara industri antarabansa,” ku iya.
Kelimpah ari nya, iya madah, Sarawak mega deka nyadi tuai rumah ngatur Gempuru Besai ICCA ke-55 dalam bulan November 2016 (ICCA – International Congress and Convention Association).
“Gempuru tu mega ulih matak mayuh orang ari luar menua tu mantu orang di menua tu enggau aum antarabansa sereta tukang ngatur atur pengawa di Sarawak kelebih agi di Kuching,” ku iya.
Jamali muji pengawa nembiak kus Dagang Temuai ke mujur ngatur Koktail betemu enggau raban industri dagang temuai menua tu nyengkaum ssekeda ari Sarawak Convention Bureau enggau Opis Menteri Pengawa Dagang Temuai ti sama bisi dikangau ngagai atur pengawa nya.
Nangkan atur pengawa koktail enggau chabut perais betuah, bala nembiak enggau temuai bukai dibai makai lemai ba endur ke sama.
Pemerat tuju ngaga atur pengawa nya, ngambika bala nembiak kus Dagang Temuai di UiTM ngelala sapa raban industri di menua tu, kelimpah ngulih penemu ari sekeda raban industri ke bisi bejaku malam nya.