Reti nya anang semina bepanggai ngagai pengawa bejualka asil komoditi aja dalam nambahka penatai pemisi belanja
// Dikarang Chris Bishop //
BEJADI: Uggah (empat kanan) bejadi Aum Besai Ninting Taun Ke-31 PPNS di Kuching kemari.
KUCHING: Pengawa ke bisi bekaul enggau aktiviti ngelapong betanam betupi endang patut ransing agi dipejalai dikena nambahka penatai belanja, ku Sapit Kepala Menteri Datuk Amar Douglas Uggah Embas.
Bejaku ba seiti aum pengarang berita kemari, iya ke mega Menteri Betanam Betupi Moden enggau Ekonomi Menua Pesisir madah peluang ekonomi ba pengawa nya sigi bisi lalu anang kelalu ngarapka asil ari pengawa bejual komoditi aja.
Berindik enggau nya, Uggah pechaya Gerempung Orang Bekebun enggau Berikan Nengeri Sarawak (PPNS) ulih nyaup orang bekebun enggau berikan nambah pemisi belanja sida nengah aktiviti bukai ke bekait.
“Pengawa bukai kelimpah arika bejual lada tauka sawit baka ke ngadu proses sereta mungkus asil kitai nya patut ransing agi diadu lalu tu sebengkah agi chara ke ulih ngenatai pemisi.
“Diatu aku meda pengawa tu bedau mayuh dikereja lalu PPNS ulih nyaup ba sentang pekara tu.
“Kelimpah ari nya kitai mega patut nyendia servis, nyengkaum nyendia servis nyuwa perengka berat ngagai orang bekebun.
“Perengka berat nya ulih ngangkatka produktiviti kelimpah ngurangka penyampau orang gawa,”ku iya.
Ketegal nya, Uggah ngarap PPNS ulih nitihka pelin ti udah diperambu perintah ti dikearap ulih ngenegap ekonomi gerempung kelimpah ngangkatka penatai pemisi peranak menua pesisir.
Dulu agi ari nya Uggah udah bejadi Aum Besai Ninting Taun Ke-31 PPNS ke diatur di seiti hotel ditu.
Ba pengawa nya mega Uggah bisi nyuaka cek dividen PPNS ba penyampau RM174,359 ngagai 28 Gerempung Orang Bekebun enggau Berikan Kawasan (PPK) di serata nengeri.
Cek diterima Pemancha Tony Kulleh (Chairman PPK Belaga).
Uggah mega bisi nyuaka cek Kumpulan Wang Kebajikan ba penyampau RM84,000 ngagai Chairman PPK Serian, Pemancha Salbiah Emon.
Bela datai Menteri Muda Betanam Betupi datuk Francis harden enggau Chairman PPNS Datuk Sylvester Entrie Muran.