LIDONG (Betong): Perintah penapat mantu ngangkatka penatai pemisi peranak menua pesisir dikena nentuka sida pansut ari pekuh penyeranta.
Berindik ari nya, perintah dipegai Barisan Nasional deka meda rayat nguna awak ti disedia nengah ejensi-ejensi perintah ke bisi laban disedia ungkup rayat ti bisi pengingin ngubah tikas pengidup sida enggau diri sebilik.
Kaban Kunsil Nengeri (ADUN) Engkilili Dr Johnical Rayong Ngipa madah, diatu enda mayuh rayat di menua pesisir ngambi awak nya lalu tu balat ngasa laban awak nya endang disedia ungkup sida.
“Nya alai kitai ngarapka rayat ba menua pesisir kelebih agi sida ke bisi tanah ulih ngereja tanah Adat Bansa Asal (NCR) sida enggau utai tanam komersial baka lada, koko, sawit, getah enggau ke bukai sereta tau betupika ikan, serati enggau manuk,” ku iya.
Iya mansutka jaku nya lebuh pengawa bejadika Projek Jalai enggau Entali Ai Rumah Bulie, Lidong Pandak, Betong, ti bela digulu Kaban Parlimen (MP) Lubok Antu Datuk William Nyalau Badak, ensanus.
“Kitai enda ulih semina ngarap aja laban penyenang dalam pengidup datai ari pengeransing diri gawa sereta berani ngerebut bantu disediaka ejensi perintah dipilih bepelasarka peminta sida empu,” ku iya.
Ku iya, endang udah dikeandalka perintah ari baruh pegai Kepala Menteri Datuk Patinggi Tan Sri Adenan Satem sereta sapit iya, Datuk Amar Douglas Uggah Embas dekaka penatai pemisi rayat di nengeri tu pengabis nadai RM4000 sebulan tauka lebih agi manggai taun 2020.
“Kitai Iban endang diaku kaya tanah tang asil dipansut ari tanah enda setipak enggau pemesai tanah datai bepuluh ikar tang semina repa aja. Kitai deka rugi endar laban tanah tu ke bendar ulih mansutka asil ti menyana,” ku iya nyentuk.
Tandu iya, sitak Engkilili udah jauh berubah sereta udah mayuh kandang menua disambung ngena jalai alun enggau bekal elekterik enti dibanding enggau 10 ngagai 15 taun ke udah.
“Ambi ke chunto, Kubal, Tabut, Duri Bangat, Skrang Ili enggau Lidong suba jauh tinggal tang diatu udah jauh mansang ba pemansang jalai alun enggau bekal elekterik ngayanka perintah BN nengah pengari rayat iya bebendar gawa ngemansangka rayat,” ku iya.
Ba lansa ke bukai, William Nyalau bela bisi bejaku ngemai rayat bediri tegap ari baruh pegai pengari rayat ke bisi sekalika ba tikas DUN tauka Parlimen.
“Aku lantang endar laban bisi kaul kerejasama rat enggau ADUN kitai (Dr Rayong) laban tu deka ngemuntangka kami ngelangkar pemansang ba sitak parlimen tu,” ku iya.
“Nya alai, aku dekaka rayat kelebih agi bala pengundi terus taluk begulai enggau perintah BN sereta mantaika sukung sida maya Pengawa Bepilih Besai (PRU) ti deka datai baka ke udah dibantai rambau Pengawa Bepilih Nengeri (PRN) tu tadi,” ku iya seraya ngemai bala pengundi nulak penatai chalun ukai peranak asal menua nya.
Dulu agi ari nya, Dr Rayong mega bisi ngemendarka pemeri belanja RM8,500 iya nya penyampau RM500 ungkup genap pintu bilik ngagai 17 pintu bilik Rumah Bulie lalu Biro Indu nerima RM3,000.
Nyalau mega bisi ngagihka belanja penyampau RM20,000 ungkup belanja dikena peranak rumah panjai nya bebelika perengka kena ngentak rumah panjai baru sereta RM3,000 da agi ungkup Biro Indu.
Sama bisi datai Pemesai RELA Lubok Antu Joseph Jangin, Penghulu Betuk Tubi, Penghulu Gerang Anchih, Ketuai Raban Nembiak Parti Rakyat Bersatu (UPP) Engkilili Peter Jawi, bala kaunsilor, bala tuai rumah sereta bala pengari ari parti komponen BN ke bukai.