Raban nembiak diperangsang ngerejista diri nyadi pengundi

0

Tu endang udah nyadi hak peranak Malaysia nyadi pengundi lalu sida patut bejalaika tanggungpengawa diri

MIRI: Chairlady Raban Indu Parti Pesaka Bumiputera Bersatu (PBB) Pujut, Lila  Mohamad ngansak raban nembiak kelebih agi Bumiputera ti apin berejista nyadi pengundi sebedau 30 September tu.

Ku iya, bisi tiga ngagai empat hari agi endur sida ngerejista diri nyadi pengundi bejalaika tanggungpengawa sida nyadi peranak Malaysia sereta hak sida ngundi.

“Aku nesau bala nembiak kelebih agi raban nembiak Bumiputera rebak baru ngerejista diri nyadi pengundi,” ku Lila madah ngagai Borneo Post kemari.

Kenu ku Lila, sida ti deka ngerejista diri nyadi pengundi tau ngelawa Pos Opis besemak sereta ngemai tingki maya rejista.

Ku iya, ngerejista diri nyadi pengundi ukai nya lama, semina lima minit aja lalu nadai bebayar.

Lila madah, pom bisi disedia ba Pos Opis lalu sida ti apin nyadi pengundi tau terus ngelawa kaunter enggau minta pom sereta sida deka rejista terus dia.

“Sinu endar lebuh beratika majoriti nembiak bumiputera apin bejalaika hak sida nyadi pengundi laban sida apin rejista ngundi rambau pengawa bepilih diatur lalu dikearap sida deka rejista sebedau 30 September,” ku iya nandu.

Nitih ku Ketuai Raban Indu PBB Pujut, raban indu udah bejalaika tanggungpengawa sida ngemai mayuh agi raban nembiak rebak baru ti apin ngerejista diri enggau bejalaika kimpin meransang nyadi kaban.

Ku iya, naka ke diatu, raban indu udah mujur ngatur sekeda program meransang bala kaban nyadi pengundi.

Nya alai sehari tu, ku iya, tu tesau kepenudi ngagai raban nembiak sereta sida ti apin ngerejista diri nyadi pengundi ngambika ngerejista diri sebedau 30 September, nentuka sida ulih bejalaika hak ngundi maya pengawa bepilih ti deka datai.

Ku Lila, pekara tu beguna endar ngagai raban nembiak ngerejista diri nyadi pengundi ngambika pinta sida ulih diperunding dalam pengawa numbuhka perintah.

Ngelama tu, kitai ulih meda raban nembiak nyereta diri dalam protes, ningkah enggau ke bukai, taja pia, naka ke diatu kitai enda nemu nyema sida tu udah ngundi maya mantaika protes sida, ku iya nandu.

Nangkan ke nya, ari perati iya penyampau tubuh raban nembiak enggau bumiputera ti apin rejista nyadi pengundi dalam beratus iku.

Ba lansa ke bukai, Komiti Pengawa Bepilih (SPR) ngeripot bisi lebih ari 4 juta rayat ti apin rejista nyadi pengundi.