DOPPA dikearap negika hak pekebun mit sawit di Sarawak

0
KUALITI: Salang nunjuk chara ngetau Buah Tandan Baru (BTS) ti udah mansau kelai bejadi Hari Terbuka DOPPA ke diatur begulai enggau MPOB ba Balai Komuniti Pakan, semak ditu kemari.

KUALITI: Salang nunjuk chara ngetau Buah Tandan Baru (BTS) ti udah mansau kelai bejadi Hari Terbuka DOPPA ke diatur begulai enggau MPOB ba Balai Komuniti Pakan, semak ditu kemari.

Salang: Laban serakup tu deka nyungkak asil sereta ngemansangka pekebun mit di nengeri tu

PAKAN: Pengawa numbuhka Serakup Penanam Sawit Dayak Sarawak (DOPPA) dipelaba deka negika hak pekebun mit sawit di nengeri tu.

Kaban Parlimen (MP) Julau, Datuk Joseph Salang Gandum madah, bepelasarka tuju enggau juluk DOPPA ti ditumbuh kenyau ari Januari 2015, kitai andal iya deka mai mayuh pemaik ngagai bala pekebun mit sawit di nengeri tu.

“Kaul DOPPA dalam industri sawit di menua tu deka mai bala pekebun mit di nengeri tu ngagai seiti tikas dalam industri nanam sawit ti tegap sereta ulih besemekih, kelebih agi dalam nambahka asil ke bekualiti.

“Kelimpah ari nya, penumbuh DOPPA tu mega deka mantu bala pekebun mit ari sekeda piak ti suah beambi ulih ba raban tu kelebih agi ari sukut pengawa bebelika produk baka Buah Tandan Baru (BTS),” ku Salang.

Iya mansutka jaku nya rambau program ‘Hari Terbuka DOPPA’ ti diatur begulai enggau Lembaga Minyak Sawit Malaysia (MPOB) ba Balai Komuniti Pakan, semak ditu, kemari.

Urung 200 iku pekebun mit sawit ari Parlimen Julau bisi datai ngulu program tu.

Program tu keterubah iya diatur DOPPA kenyau ari iya ditumbuh.

Ku Salang, nyema DOPPA bejalaika tanggungpengawa enggau lurus sereta chakah, kitai pechaya iya deka meri pengandal ke baru ngagai bala pekebun mit sawit ngasaika asil ari pengelelak sida bekereja.

Nya alai ku iya, sukung tegap ari bala pekebun mit sawit endang diguna enggau ngerejista diri nyadi kaban ba serakup tu.

“Enti kitai seati, dalam sebengkah gerempung ti tegap, kitai andal tetiap penanggul ti nuntung ulih diputar ngena chara ti pemadu manah,” ku iya.

Berebak enggau nya mega, Salang nyemetak madah nyentukka sehari tu, sepenyampau RM34 juta udah diagih ngagai bala pekebun mit sawit ari Parlimen Julau nengah MPOB.

Agih belanja nya ku iya, nyengkaum bantu meri paung sawit, baja, rachun sereta mayuh agi bantu ke bukai.

“Diatu kitai benung berandau enggau MPOB ngambi nambahka agi agih belanja sereta meri mayuh agi bantu ngagai industri sawit ba kandang menua tu, laban kandang menua tu ngembuan mayuh pengelebih maju dalam industri tu enti diberi fokus lebih.

“Dalam langkar perambu kitai mega deka nirika sebuah kilang nginjin sawit ba Parlimen Julau tu dikena ngemuntangka bala pekebun mit ari menua tu nyual asil sida enggau nadai nengah orang tengah agi.

“Nya alai enggau chara tu ila, bala pekebun mit deka ngasaika asil ke dijual ti manah,” ku Salang nandu.

Ba lansa ke bukai, Chairman DOPPA, Dr. Richard Mani Banda ba jaku dipansutka iya madahka tuju DOPPA tu ditumbuh laban deka mantu bala pekebun mit sawit ari semua pekara ti bekaul enggau industri tu.

“Batang pekara ti dikemerat iya nya mantu sida ngemansangka tanah enggau produk betanam betupi ti ulih meri penguntung nyema dikereja dalam skala ke besai sereta pengeransing.

“Kelimpah ari nya, DOPPA mega deka nambahka penemu enggau pengelandik bala kaban serakup ti udah berejista enggau DOPPA nengahmayuh macham aktiviti baka ngatur kus, licha enggau sekeda program bukai ti bekaul enggau industri tu.

“Nya alai, kitai ngarapka dalam pengawa ke baka tu, penyampau kaban berejista enggau DOPPA sehari tu (kemari) iya nya 300 iku di serata nengeri deka majak nambah, ngambi nyadi sebuah serakup ti kering sereta tegap negika hak pekebun mit sawit di nengeri tu,” ku Richard nyemetak.

Beserimbai enggau pengerami ke sebaka, Richard mega madahka DOPPA deka ngelancharka Koperasi DOPPA kena 8 Oktober (Hari Enam) tu ila, ngelalu penatai semua piak, kelebih agi bala pekebun mit sawit bela sampal datai sereta meri sukung ngagai program tu ila.