SIBU: Perintah nengeri deka chakah nyukung Industri Ngaga enggau Ngemanah Kapal (SBSR) dikena nyaup pengawa nambahka agi kapasiti industri ngaga kapal di nengeri tu ngambika ulih ngaga kapal ti besai agi.
Menteri Muda Pemansang Industri (Puku enggau Promosyen) Datuk Julaihi Narawi madah, tu nyengkaum pengawa ngaga sub SBSR di Tanjung Manis.
“Sukung perintah nengeri tu bepun ari meda SBSR nyadi seiti ari penyungkak penatai pemisi nengeri kelimpah ti nyadi kelima pemadu besai meri asil ngagai penatai pemisi nengeri kitai,” pia ku iya madah.
Iya mantaika jaku tu maya ngarika Menteri Pengatur Pengeraja Asal enggau Rampa Menua II Datuk Amar Awang Tengah Ali Hassan bejadi Malaysia International Marine Expo 2016 (MIMEX 2016) di Sibu Trade and Exhibition Centre (STEC) ditu, kemari.
Julaihi madah, industri tu deka majak nyadi seiti ari 10 industri besai ti majak mansang.
“Nitihka Malaysian Industry Government Group for High Techonology (MIGHT) ba taun 2015, penyampau kapal ke digaga di Sarawak iya nya 127 buah enggau penyampau rega eksport semua iya RM389 juta,” ku iya nambahka baru.
Bekenangka MIMEX 2016, ku Julaihi, tu sebengkah ari program pemandang kapal ti pemadu beguna ba menua tu.
Ku iya, ari tu, sida ti bekaul ulih betemu enggau bala pengari kompeni ari macham bengkah menua di Asean.
“Program tu nugungka macham bengkah kompeni baikka ari menua tu empu tauka menua luar ti mantaika mayuh produk enggau teknologi ke baru.
“Ari nya aku pechaya, bala mayuh ari industri ngaga kapal ulih bekunsika penemu enggau pangan diri,” pia ku iya madah.
Nambahka nya, Julaihi madah, program pemandang baka tu tau nyungkakka agi industri ngaga kapal ba menua tu kelimpah mantaika penemu baru ngagai mensia mayuh baikka ari sukut pengawa dagang tauka awak pengawa puang.
“Sarawak andal sereta temegah ati nyema agi diberi awak alai ngatur MIMEX.
“Kebuah pia laban perintah nengeri endang chakah deka ngemansangka industri ti bekaul enggau tasik,” ku iya madah baru.
Program pemandang tu digulu 50 bengkah kompeni ti datai ari menua baka Singapura, Jipun, Korea, Indonesia, Jerman, China, Thailand enggau Semenanjung Malaysia mandangka macham bengkah produk enggau teknologi ti beungkus lebih RM50 juta.