BESAUP NGINTU PENGELIKUN: Julaihi (tengah) dikemataka Khairul (dua kiba) enggau bala bukai nyuaka kad RAKAM ngagai seiku orang ke beempu kapal di Sibu, kemari.
SIBU: Soldadu Tasik Diraja Malaysia (TLDM) nadai napi sebarang pekara ti ngeruga pengelikun baka penyalah ti bekaul enggau soldadu ba tasik nengeri Sarawak enggau Sabah.
Panglima Wilayah Laut II Datuk Khairul Anuar Yahya madah, tu nyengkaum piak sida ti nadai bekaul enggau penyalah baka pengawa naban ke orang ba tasik.
Ku iya, penyalah baka nya, diatur piak penerit adat ari Opis Menteri Dalam Nengeri (KDN) baka Agensi Penerit Adat Maritim Malaysia (APMM) tauka Polis Marin.
“Naka ke diatu, piak kami madahka tikas pengelikun ba tasik Sabah tauka Sarawak mengkang likun.
“Tang taja pan baka nya, piak kami semampai 24 jam besedia nyaup piak penerit adat ke bukai nyema sida minta saup,” pia ku iya madah ngagai pengarang berita.
Iya nimbal munyi nya maya ditanya sentang pengawa TLDM ngintu pengelikun ba tasik Sabah enggau Sarawak.
Dulu agi ari tu iya nyempulang Menteri Muda Pemansang Industri ti mega Menteri Muda Penatai Pemisi Menua Pesisir Datuk Julaihi Narawi bejadika Rakan Maritim (RAKAM) ungkup sitak Sibu.
Pengawa tu diatur beserimbai enggau Malaysia International Marine Expo 2016 (MIMEX 2016) di Sibu Trade and Exhibition Centre (STEC) ditu, kemari.
Nambah jaku iya baru, Khairul mega madah, taja sida semampai nginau pengelikun di tasik tang sida enda ulih nyaga pengelikun ba genap sukut tasik.
“Piak kami enda ulih nyaga ba tiap inchi tasik kitai.
“Tang kami endang sigi nyikap diri napi sebarang pengawa ti salah sereta semampai besedia bekerejasama enggau piak ke bukai ngintu pengelikun tasik kitai,” ku iya nerangka baru.
Bekenangka RAKAM, Khairul madah, pengawa nya seiti ari inisiatif Panglima TLDM Laksamana Tan Sri Ahmad Kamarulzaman ngangkatka agi tikas pengelikun tasik menua tu.
Ku iya, RAKAM udah dipenyadi pun taun tu tadi lalu udah dipejalaika baka di Kuching, Sandakan, Kota Kinabalu enggau Kuantan.
Iya madah, RAKAM ditumbuh dikena ngaga pelasar alai mensia mayuh ngeripot nyema bisi tepedaka orang ngereja pengawa salah di tasik.
“Nengah RAKAM, sida ke beempu kapal, gerempung kapal tauka orang berikan ulih besaup enggau piak penerit adat munaska penyalah ke dikereja ba tasik.
“Sida tau betelefon tauka nganjung gambar pengawa salah nengah ‘whatsApp’ ngagai piak ti bekaul baka APMM, polis Marin, Opis Tasik enggau Opis Berikan,” ku iya madahka baru.
Khairul mega madah, nangkan ke tu RAKAM deka dikerembaika ngagai sitak bukai baka di Sarikei enggau Miri.