Disalin Ari Churchill Edward//
PALAN BARU R&D: Mawan (dua kiba) enggau Direktor Besai MPB, Dr Harry Entebang (kiba) benung nanjak bukit ngagai palan baru projek R&D di Semonggok.
KUCHING: Chairman Kaunsil Lada Malaysia (MPB) Tan Sri William Mawan Ikom berundingka patut bisi kerejasama baru entara ejensi perintah, kompeni peribit enggau pekebun mit dikena ngemansangka industri lada.
Kerejasama baru enggau peribit nya ukai semina ulih ngenegapka penyereta enggau penatai pemisi pekebun mit tang mega semua ti bisi kaul ba industri tu nyaup ngangkatka ekonomi menua, pia ku iya lebuh dikerandau ditu kemari.
“Diatu kitai enda tau enda ngempung semua pengawa nya nengah inisiatif kompeni peribit ari ti ngelempaika semua ba MPB aja,” ku iya.
Ku iya, MPB mega ngembuan juluk deka ngaga empas ke besai ba pengawa mansik enggau ngemansang (R&D) sereta ngemanahka chara.
Mawan ti mega Kaban Kunsil Nengeri Pakan madah, nyadi sebagi ari opis lada di Sarawak, pekebun mit enggau orang ti nanam lada patut muai runding lama baka ngena tuat ba pengawa nanam lada, tang bepikir ngelui ari nya baka di Vietnam ti nyadi pengeluar lada lumur satu di dunya diatu.
Ku iya, pekebun di Vietnam nanam paung lada sida ba sebarang endur ke ulih dikena lada sida niki lalu ukai semina bepanggai ba tuat aja.
“Kuing strategi MPB mega deka ngangkatka industri lada nuju pemansang nasional nengah pengasi program enggau aktiviti sereta nyulut ba servis. Kami mega ngembuan juluk diakun ba renggat antaranbansa nyadi organisasyen ti nyulut sereta bisi kuasa nyadi ketuai ba pemansang industri lada,” ku iya.
Malaysia ba tangga kelima pemansut lada dunya pengudah Brazil, India, Indonesia enggau Vietnam lalu Sri Langka ba tanggau keenam, ku iya.
“Taja pan pemansut lada kitai mengkang kurang, tang peminta ba lada Sarawak majak nambah lalu produk Sarawak bisi peminta ba menua tu empu enggau ba renggat entarabansa,” ku iya.
Mawan mega madahka diri berasai temegah ati ketegal udah dichiri nyadi chairman MPB. Iya berasai lantang ati laban indu opis di Kuching nya payung ngagai opis kandang menua di Sarikei, Sibu, Betong, Bintangor, Sri Aman, Serian, Bintulu, Belaga, Miri, Johor Bahru enggau Kota Kinabalu.
Ku iya, pengawa nanam lada ukai pengawa ti nyelai ba iya laban sida sebilik udah ngereja pengawa nya kenyau iya beumur lima taun.
Mawan deka nyadi chairman aum keterubah ditu kena 27 Oktober tu. Kena 30 september tu tadi, iya bisi diberi pemesai MPB penerang ba indu opis di Bintawa sebedau sida ngelawa palan baru ungkup projek R&D di Semonggok sereta palan memproses lada di Bintawa ditu.