BANTU: Entara 690 penerima tauka ruang bilik dalam DUN Mambong ke nerima Duit Pengasih Ampuh Bah Nengeri Sarawak, ti disuaka Dr. Jerip, kemari.
KUCHING: Perintah udah nyuaka Duit Pengasih Ampuh Bah Nengeri Sarawak ngagai 690 penerima tauka ketuai ruang bilik ti mungkur 24 buah genturung pendiau dalam Sitak Kunsil Nengeri (DUN) Mambong, ti sepenyampau RM345,000, kemari.
Menteri Muda Pengerai Mensia Mayuh, Datuk Dr. Jerip Susil minta ketuai ruang bilik ke teberayan nama ari dipasukka nyadi penerima Duit Pengasih Ampuh Bah Nengeri Sarawak, dipinta ngerejista baru nama nya ba opis pelilih menua.
Iya madah, nya ngambika penerima ke patut nya tauka kena penusah ampuh bah di nengeri tu, ulih sama nerima bantu ari perintah.
“Kitai nemu bisi sekeda nama ketuai ruang bilik bisi teberayan ari nama ari lis penerima Duit Pengasih Ampuh Bah, lalu nya ukai sengaja tang laban bisi penanggul.
“Nya alai kitai minta ketuai ruang bilik nganjung baru nama ngagai opis pelilih menua, baka ditu patut dianjung ngagai pegawai ba opis pelilih menua Kuching. Kitai deka meri ba renggat kedua ila.
“Sehari tu kitai nyuaka Duit Pengasih Ampuh Bah Nengeri Sarawak ngagai 690 penerima tauka ketuai ruang bilik ti mungkur 24 buah genturung pendiau dalam DUN Mambong, ti sepenyampau RM345,000,” ku iya.
ADUN Mambong meri lalau nya lebuh ke bejaku ba program nyuaka Duit Pengasih Ampuh Bah Nengeri Sarawak, ke diatur ba Dewan Mayuhguna Kota Padawan ditu, kemari.
“Ngarapka bantu tu ulih ngelempungka mimit tating belanja bala penerima,” ku iya.
Entara 24 genturung pendiau dalam sitak DUN Mambong iya nya Genturung Pendiau Mambong bisi; Nyiru @Nyiruk Batu; Bratan benuk; Bratan @Batu Asah; Bawang; Abang; Bengoh; Timurang; Simboh; Dangak; Skubang; Segubang; Danu; Taman Idaman Batu 13 sereta Poh Kwong Quarry.
Nambahka nya Genturung Pendiau Sikog; Emperoh Semedang; Emperoh Betung; Emperoh Gerung; Emperoh Giam Batu; Emperoh Jambu; Emperoh Grait; Emperoh Karu enggau Genturung Pendiau Emperoh Git.
Berebak enggau tu Dr. Jerip beterima kasih ngagai piak bekaul baka Jabatan Pertahanan Awam, Polis, Bomba enggau ke bukai ke sama besaup mantu peranak genturung pendiau ke tasah ampuh bah.
Iya ngelalau peranak genturung pendiau ngambika nyikap diri tauka bejaga lebih agi maya musim pengujan.
“Semua peranak genturung pendiau ke selalu kena penasah ampuh bah dipinta besedia sereta nyikap diri maya musim pengujan tu, ngambika nadai mayuh pengerusah enggau pengerugi,” ku iya.