Penyedar pasal penusah ketegal dadah patut diiri ari renggat sekula primari

0

KUCHING: Apai indai, kelebih agi piak sekula dipinta terus ngajar sereta ngiri penemu ngagai nembiak ngambika nulak sereta begedika dadah ti dikumbai munsuh lumur satu menua.

Menteri Muda Perengka Guna Mensia Mayuh (Elekterik  enggau Telekomunikasyen) Dr. Abdul Rahman Junaidi madah, program penyedar pasal penusah ketegal dadah patut diatur ungkup nembiak berengkah ari renggat sekula primari.

“Kitai enda ngenggaika diatu, bisi raban bansa nyengkaum, anak tauka nembiak kitai kemaya hari tu ke kelalu berani maruk diri enggau dadah.

“Tang, kitai tetap deka neruska pengawa munas sereta muntanka enda ngira bakani pengawa makai dadah dalam raban bansa nyengkaum ba renggat sekula enggau universiti enti ulih nadai agi penangggul dadah dalam raban bansa kitai,” ku iya.

Iya mansutka pekara nya lebuh bejaku ba pengerami bejadika Program ‘Sekolah Perangi Dadah Habis-Habisan Peringkat Daerah Kuching 2016’  ba Sekolah Menengah Kebangsaan (SMK) Bandar Samariang ditu, kemari.

Berebak enggau tu Kaban Kunsil Nengeri (ADUN) Pantai Damai nya ngarapka bala nembiak ngembuan ulah deka nemu sesebangkah pekara ti meri penguntung enggau pemanah lalu ukai deka nguji pekara ke ulih ngerusak diri, raban bansa enggau raban nembiak.

“Nya alai kitai patut besaup lalu nyereta dalam kimpin ke dipejalaika piak ti bekaul dikena munaska dadah,” ku iya.

Program Sekolah Perangi Dadah Habis-Habisan Peringkat Daerah Kuching 2016 diatur Ajensi Anti Dadah Kebangsaan (AADK) nengah kerejasama piak sekula ke dipilih.

Tuju program nya dikena meri penyedar pasal penusah ketegal dadah kelimpah ari ngatur aktiviti ti senipak enggau pengawa deka meri penyedar pasal penusah ketegal dadah ke bisi nyadi dalam raban bansa.

Sama bisi datai, Sapit Direktor AADK Sarawak Kartina Ujin sereta Prinsipal SMK Bandar Samariang Abang Othman Abang Masagus.