KUCHING: Balai Dagang enggau Industri Dayak (DCCI) ngelaluka ungkup belanja RM1.3 bilion ari perintah besai nengah Bajet 2017 dikena mantu orang bumai nyengkaum umai bukit ti tebal agi di Sarawak.
Presiden DCCI Datuk Joseph Salang Gandum madah,taja pia iya ngarapka pengawa meri bantu nyengkaum rega subsidi, benih enggau baja beri ngagai orang ti amat ngemeranka pengawa bumai.
“Aku arapka pengawa nyadung bantu nya diberi ngagai orang ti amat ngemeranka pengaw bumai. Enti enda pia, juluk meri bantu nya enda tejapai enti diberi ngagai orang ti enda patut nerima,” ku iya lebuh dikerandau kemari.
Salang ti mega Julau MP, bisi ba Parlimen di Kuala Lumpur kemari maya Menteri Besai Datuk Seri Najib Tun Razak bejuraikabajet nya.
Berebak engagu nyar, Salang minta nembiak Dayak nyereta sereta nguna peluang ti bisi ba mayuh bengkah program ke dibantaika Najib ari baruh Najib empu dikena mantu raban B40 tauka raban ti penatai pemisi mit.
Ku iya, nembiak Dayak ulih beratika program agrodagang dikena ngemansangka tanah sida, sebaka enggau program dagang ke bukai ti setipak enggau penau sereta pengelandik sida.
“Kami arapka bala nembiak ulih nyereta lalu nelebaka diri enggau pemansut belanja ungkup program nya,” ku iya.
Ari baruh Bajet 2017,Najib udah madahka RM275 million deka diungkup ngagai program nya dikena mantu ngangkatka penatai pemisi kelebih agi ti ari baruh raban B40.
Tu nyengkaum RM100 milion ungkup program agrodagang ti deka nempa 3,000 orang dagang biak sereta ngerembaika Program ‘Mobilepreneur’ Giatmara ngena ungkup belanja RM30 milion ti nagit penguna mutosikal.
RM100 milion agi diungkup kena ngeregaska baru program eUsahawan enggau eRezeki ari baruh Malaysian Digital Economy Corporation (MDEC),
“Ngenang semua, aku ngasaika bajet tu positif amat taja pan betapi pemar ekonomi global. Kelimpah ari nya mayuh mega inisiatif bukai ti dibantaika nengah bajet tu dikena ngemansangka menua pesisir, seriris enggau program transformasyen menua pesisir Sarawak,” ku iya.