KUCHING: Menteri Pengatur Penyampau Pengereja Pengawa Datuk Seri Richard Riot Jaem ngenukuka opis menteri iya sedia mantu Sarawak ngemaju modal mensia dikena ngisi peminta ari industri dalam nengeri.
Ku Riot, nengah kapasiti nyadi menteri ba perintah besai sereta peranak Sarawak enggau naka ulih mantu perintah nengeri ngemeratka pengawa ngemansang modal mensia, kelebih agi lebuh penyampau penyereta pengereja pengawa nengeri Sarawak baruh ari 70 peratus.
Ku iya, bisi pematut fokus ngemaju modal mensia ngambika mayuh agi penyampau rakyat ulih nyaup Sarawak ngaga aktiviti ekonomi ti beungkus besai.
“Aku setuju enggau pemutus Kepala Menteri (Datuk Patinggi Tan Sri Adenan Satem) deka nguna jaku Inggeris nyadi jaku rasmi kelimpah ari jaku Malaysia dikena ngangkatka pengelandik bejaku Inggeris ba peranak Sarawak awakka sida ulih bebendar agi besemekih,” ku iya.
Teks jaku Riot dibacha Sapit Ketuai Sekretari (Operasyan) Opis Menteri Pengatur Penyampau Pengereja Pengawa Dr Mohd Ghazali Abas ba sesi betajuk ‘Memajukan Modal Insan,
Asas Pertumbuhan’ ba Aum Beranakka Puku enggau Dagang Sarawak Ke-3 ditu ensanus.
Aum ti berambaika jaku’Ke Arah 2020: Memacu Pertumbuhan dan Pembangunan’ diatur Institut Strategi dan Kepimpinan Asia (ASLI) udah dipenyadi Adenan.
Ku iya Komiti Penyikar Industri ti dilancharka ari baruh Bajet
2016 endang deka ngatur lalu ngemataka pelajar teknikal enggau vokasional sereta program latin enggau kerejasama industri ungkup Sarawak enggau Sabah disukung 30 peratus nengah ungkup belanja ari Wang Turu Pemansang Pengatur Penyampau Pengereja Pengawa (HRDF) ari baruh opis menteri iya.
“Sarawak ke bendar ngasaika peratus ti tinggi ari sukut agih belanja dibanding enggau nengeri bukai taja pan ngembuan kurang ari 1,000 buah kompeni tu berejista,” ku iya.
Riot mega madah, opis menteri iya deka nguji ngaul inisiatif ari baruh Atur Pemansang Malaysia Lumpar Ke-11, nyendiaka pengereja pengawa ti landik sereta ngangkatka produktiviti sida, nengah chara meri fokus ti lebih ngagai nembiak enggau orang indu ti nadai pengawa.
Iya ngenukuka benung beratika enggau bebendar pekara bekaul peminta lalu mansik baru agih belanja ungkup Perbadanan Tabung Pembangunan Kemahiran (PTBK) Sarawak, nyengkaum numbuhka sebuah institusyen di Sarawak dikena mantu mayuh agi rayat menua tu ngulihka setipikit jurulatih latih vokasional.
Ku Riot baru, opis menteri iya mega deka nyendia belanja nengah levi HRDF ungkup program Skim Latihan 1Malaysia (SL1M).
“Prospek makit pengereja pengawa majak teguh lalu nya tepulai ngagai kitai bekerejasama…perintah, dagang enggau rayat meseti bekerejasama laban pemansang modal mensia endang tanggungpengawa kitai semua,” ku iya. — Bernama